Дембеле Франция терма жамоаси сафида расмий ўйинлардаги илк голини қўшниларимизга урди

"Барселона" ҳужумчиси Усмон Дембеле кеча “ЖЧ-2022” саралашининг 2-турида Қозоғистонга (2:0) қарши ўйинда рақиб дарвозасини ишғол қилди.

Эътиборлиси, бу 23 ёшли футболчи учун Франция терма жамоасида расмий ўйинларда киритган илк голи бўлди. Бунгача Дембеле 23 та ўйинда майдонга тушган ва ўртоқлик ўйинида 2 та гол уришга эришган эди.

Дембеле жорий мавсум "Барселона"да 35 та ўйин ўтказди ва ўз ҳисобига 9 та гол ҳамда 4 та голли узатма ёздириб қўйди. Унинг каталонияликлар билан амалдаги шартномаси 2022 йилга қадар имзоланган.