Дембеле "Олтин тўп" учун асосий номзодларни айтди

Амалдаги "Олтин тўп" соҳиби, француз футболчиси Усман Дембеле бу йилги мукофот учун ўз фаворитларини санаб ўтди. Унинг фикрлари France Football журнали томонидан келтирилган.

"Менинг учталик рўйхатим? Аниқ тартиб йўқ, барчаси бир даражада: Хвича Кварацхелия, жуда яхши мавсум ўтказган Гарри Кейн ва, деб ўйлайман, Килиан Мбаппе", — деди Дембеле.

"Олтин тўп" мукофотига France Football журнали собиқ бош муҳаррири Габриэль Ано асос солган. Ушбу соврин илк бор 1956 йилда англиялик "Блэкпул" клуби ҳужумчиси Стэнли Мэттьюзга топширилган. Ғолибни футбол бўйича ихтисослашган журналистлар овоз бериш орқали аниқлаган.

Дастлаб "Олтин тўп" фақат европалик футболчиларга бериларди. 1995 йилдан бошлаб ҳар қандай миллат вакили ушбу мукофотга даъвогар бўлиш ҳуқуқини қўлга киритди, бироқ шарт шу эдики, футболчи албатта Европа клубида тўп суриши керак эди. 2007 йилдан эса бу чеклов бекор қилинди ва исталган мамлакатда ўйнайдиган футболчи "Олтин тўп" учун кураша оладиган бўлди.

2010–2015 йилларда соврин France Football журнали ва Халқаро футбол федерацияси (ФИФА) ҳамкорлигида топширилди. 2016 йилдан эътиборан икки алоҳида мукофот берилади: бири — нашр талқини бўйича, иккинчиси — ФИФА талқини бўйича. ФИФА версиясида йилнинг энг яхши футболчиси учун мукофот 1991–2009 йилларда ҳам алоҳида тарзда тақдим этилган.