Денис Иванков: «Унга нисбатан ноҳақлик қилинди»

Ўзбекистон миллий терма жамоасининг дарвозабонлар билан ишловчи мураббийи Денис Иванков сайтимиз меҳмони бўлди. Мутахассис сайтимиз учун берган интервьюсида, «Пахтакор»даги фаолияти ва Питер Хюстра олиб бораётган ротация ҳақида фикр билдирди.

- Нима деб ўйлайсиз, Жасур Абдураимов нима учун «шерлар» мураббийлар штабидан четлатилди?

- Катта эҳтимол билан Питер шу йўсинда ўз ўрнини суғурталамоқчи бўлди. Гап шундаки, агар у омадсизликка учраса, раҳбарият ўйлаб ўтирмасдан Абдураимовни унинг ўрнига тайинлаши мумкин эди. 15 йилдан бери жамоа учун меҳнат қилган Жасур учун афсусдаман. У клуб академиясида ишлаган. Кейинроқ, ёшлар жамоасида ҳам фаолият олиб борди. Ўз ўйин услуби ва стратегиясига эга маҳаллий мутахассисни қўйиб юбориш учун бундан бошқа сабаб кўрмаяпман.

- Сиз бундан аввалги интервьюларингиздан бирида «Насаф»ни ўз уйим, деб атаган эдингиз. Энди ўринли савол туғилади. Абрамов ёки Бердиев?

- Жуда ҳам қийин савол. Шундай бўлса-да, мен Рўзиқул Бердиевни танлайман. Айнан шу инсон мени ўз жамоасига чақирган. Унинг қўл остида янги даражага кўтарилдим, деб ўйлайман. Қаршига келгач, ўзимни топдим. Бу ерда ўтган йилларим чоғида, ўз дастуримни ишлаб чиқдим. Мен келгач, жамоамиздаги дарвозабонлар ўз тенгқурлари орасидаги миллий жамоалардан чақирув олишни бошлади. Баъзан, 3 шогирдим терма ва ёшлар жамоасидан чақирув олар, шу боис машғулот ўтказиш мақсадида академияга йўл олар эдим. Қашқадарёда ўтган даврларим фаолиятимда бурилиш ясаган, деб ҳисоблайман.

- «Пахтакор» билан шартнома имзолагач, «Насаф»га қарши тўп суришга тўғри келди. Қаршига келганингизда, ўзингизни қандай ҳис қилдингиз?

- Очиғи, илк ташриф чоғида жуда ғалати бўлдим. Биз «Пахтакор» билан меҳмонхонага жойлашгач, стадионга йўл олдим. Базадаги барча билан саломлашдим. Шу пайт Рўзиқул Бердиев йўлимдан чиқиб қолди. Қуюқ сўрашдик. У қаерда тўхтаганим билан қизиқдим. Меҳмонхонага жойлашганимдан хабар топгач, менга базада қолишим кераклигини айтди. Кейин, хонам ҳали-ҳамон бўш эканлигини қўшиб қўйди. Унинг таклифидан кўнглим кўтарилди, аммо профессионал бўлишим лозим. Кулганча, ортга қайтдим. «Насаф» билан қолган илиқ хотираларим ёдимда абадий қолади. Бу жамоадан миннатдорман.

- «Насаф»даги Абдувоҳид Неъматовнинг футболчидан дарвозабонга айланишига асосий сабабчи сиз бўлган экансиз?!

- Худди шундай. У 14-15 ёшга қадар ярим дарвозабон эди. Ўйинларнинг биринчи бўлимида майдонда ҳаракат қилса, иккинчи таймда унга қўлқопларни топширар эдик. Ана шундай кунларнинг бирида, «Насаф» мураббийлар штаби мажлис ўтказди. Мен Абдувоҳидни ҳимоядан дарвозага кўчириш шарт эканлигини тушунтирдим. Улар аввалига унамади. Сабаби, Неъматов марказий ҳимояда жуда ҳам ишончли тўп сурар эди. Шунга қарамай, уларни кўндиришга муваффақ бўлдим. Ўйлашимча, бу энг тўғри қарор бўлди. Ҳозир у Ўзбекистон миллий жамоасининг келажакдаги юлдузи бўлиши тахмин қилинмоқда.

Интервьюни тўлиқ форматда "You Tube"даги саҳифамизда тез кунда томоша қилишингиз мумкин.

Матнда хатолик топсангиз, ўша хатони белгилаб, бизга жўнатинг (Ctrl + Enter)

Минбар

Барча блоглар