Ди Мария "Бенфика" билан шартнома имзолашга рози бўлди

"Ювентус"нинг ҳужумкор ярим ҳимоячиси Анхель ди Мария фаолиятини Португалия чемпионатига кўчиради. "Record" нашри хабарига кўра, 35 ёшли вингернинг янги иш жойи Лиссабоннинг "Бенфика"си бўлади. Томонлар музокаралар олиб борди ва бир йиллик шартнома имзолашга келишиб олди.

Музокараларда Анхелнинг терма жамоадаги шериги ҳисобланган “бургутлар” ҳимоячиси Николас Отаменди муҳим рол ўйнади.

Шу ой бошида ди Мария Турин клубини тарк этишини эълон қилди. Ўтган мавсумда аргентиналик футболчи "кекса сенёра" сафида 40 та учрашув ўтказиб, 8 та гол урди ва 7 та голли узатмани амалга оширди.