Дик Адвокат Жаҳон чемпионатида дебют қиладиган терма жамоани бошқаради

Кюрасао футбол федерацияси 78 ёшли мутахассис Дик Адвокат яна миллий терма жамоа бош мураббийи этиб тайинланганини расман эълон қилди.

Адвокат жорий йил февраль ойида қизининг соғлиғи билан боғлиқ жиддий муаммолар сабаб лавозимини тарк этган эди. Унинг ўрнига Фред Рюттен тайинланганди. Бироқ 11 май куни Рюттен истеъфога чиққанини маълум қилди. У қарорини жамоада бўлиниш келтириб чиқармаслик ва Жаҳон чемпионатига тайёргарликка халақит бермаслик истаги билан изоҳлади.

Маълум бўлишича, терма жамоа футболчилари ва ҳомийлар Адвокатнинг қайтишини талаб қилган. Кюрасао футбол федерацияси президенти Гилберт Мартина эса мутахассиснинг қайтиши аввалдан режалаштирилмаганини таъкидлади.

Маълумот учун, Кюрасао терма жамоаси 2026 йилги Жаҳон чемпионатида иштирок этади. Жамоа гуруҳ босқичида Германия, Эквадор ва Кот-д’Ивуарга қарши баҳс олиб боради. Дик Адвокат эса мундиаллар тарихидаги энг ёши катта бош мураббийга айланади.