Dilshod Komilov: "Moliyaviy tomondan yaxshi taklif bo‘lgani rost, ammo saviyasi pastroq. Men faqat "Andijon" haqida o‘ylayapman"

Yurtimizda iqtidorli himoyachilar ko‘payib boryapti. Ulardan biri “Andijon” sharafini himoya qilayotgan Dilshod Komilov.

Bunga qadar u Toshkentda “Lokomotiv” jamoasida o‘ynagan. Bu yildan esa futbolchi “Andijon” tarkibida to‘p surib kelmoqda.

Albatta, futbolchi o‘zidan iliq taassurot qoldirib kelyapti. Uning kelajagi porloq. Yaqinda unga xorijdan taklif bo‘ldi, ammo rad qildi.

- Dilshodbek, eshitishimcha sizga yaqinda Bangladesh chempionidan taklif kelib tushgan ekan, shundaymi? Nega qabul qilmadingiz yoki sizni qiziqtirmadimi?

- Ha, taklif bo‘ldi, lekin men buni rad etdim. Mening maqsadim Xudo xohlasa yanada kuchliroq chempionatda to‘p surish.

- Qolaversa, Bangladesh chempionati saviyasi ham taklifni rad etishingizda asosiy o‘rinda bo‘ldimi? Bundan tashqari, moliyaviy jihatdan qanday sharoitlarni o‘rtaga tashlashdi?

- Moliyaviy tomondan yaxshi taklif bo‘lgani rost. Ammo Bangladesh chempionatining saviyasi pastroq va shuningdek, iqlimi ham noqulay.

- Yana boshqa qiziqishlar ham bo‘ldimi?

- Hozir men faqat “Andijon” jamoasi haqida o‘ylayapman. Butun e’tiborim ushbu klubga qaratilgan va hozirda meni bu erdan ketish niyatim yo‘q. Faqatgina chempionat tugagach, qiziqishlar haqida o‘ylab ko‘rsa bo‘ladi.

- Ikkinchi davra boshlanish arafasida. Birinchi davradan keyin "Andijon"dan yana ijobiylik kutayotganlar ko‘p...

- Ha, muxlislarimiz ijobiy natijalarni va o‘z uyimizda o‘ynashimizni kutishyapti. Xudo xohlasa, ikkinchi davrada chiroyli o‘yinlar hamda g‘alabalar bilan ishqibozlarimizni xursand qilishga harakat qilamiz. Bu bizning maqsadimiz.

- Himoyachi sifatida ayting-chi, siz uchun chempionatimizdagi xavfli hujumchi kim?

- Temurxo‘ja Abduholiqov. Yana biri Rubin Xebay.

Shuhratbek Jo‘raev.