"Динамо" сўнгги марта қачон мағлуб бўлганини биласизми?

"Динамо" – жорий мавсумда мағлуб бўлмаган ягона жамоа.

Ўзбекистон кубоги ярим финалига йўлланма олган "Динамо" жамоасининг мағлубиятсиз серияси давом этмоқда.

Самарқанд жамоаси кубок чорак финали доирасида "Олимпик"ни мағлуб (4:3) этиб, ярим финалга йўлланма олиш билан бирга Ўзбекистон чемпионати ва кубоги доирасидаги мағлубиятсиз сериясини 21та ўйинга етказди.

Про лига иштирокчиси саналмиш Вадим Абрамов шогирдлари сўнгги марта 2022 йил Суперлига доирасида 3 ноябрь куни Қаршида "Насаф"га мағлуб (0:1) бўлганди ва ҳозирга келиб "Динамо" жамоасининг мағлубиятсиз серияси 10 ойга етди. Кўҳна шаҳарликлар 21 ўйиннинг 15тасида ғалаба, қолган 6тасида дуранг қайд этган. "Динамочилар" Про лигада ҳам мағлуб бўлмаган ягона жамоа бўлиб турибди.