"Динамо"дан аразлаган Кожо яна катта саҳнада ёхуд Суперлиганинг энг яхшилари ҳақида

Суперлигада 19-тур якунига етди. 7 та ўйинда мезбонлар 2 марта ғалаба қозонган бўлса, меҳмонларда 3 та ғалаба ва яна 2 та баҳсда дуранг кузатилди. Одатдагидек, ҳар бир учрашувнинг энг яхши аниқланди.

“Нефтчи” – “Қизилқум” – 2:2. Энг яхши футболчи: Нсунгуси Эффионг

“Нефтчи” яна қимматли очколарни бой берди. Яйпанда “Қизилқум”ни қабул қилган фарғоналиклар 2:0 ҳисобидаги ғалабани қўлдан чиқаришди. Якунда 2:2 ҳисоби қайд этилди. “Нефтчи”нинг нигериялик ҳужумчиси Нсунгуси Эффионг гарчи гол урмаган бўлса-да, майдонда фаол тўп сурди ва айнан энг яхши футболчи номига сазовор бўлди.

“Локомотив” – “Навбаҳор” – 0:1. Энг яхши футболчи: Йован Жокич

Наманганликлар Тошкентда “Локомотив”га қарши ўйинда ягона гол эвазига уч очкони қўлга киритишди. “Навбаҳор”нинг энг муҳим ижрочиларидан бири сербиялик Йован Жокич яна ўзини кўрсатиб, жамоаси учун катта ҳажмдаги ишни бажарди ва у майдонда фаол кўринди.

“Сўғдиёна” – “Андижон” – 1:1. Энг яхши футболчи: Муҳаммадкарим Тоиров

Иккинчи даврани бешта мағлубият билан бошлаган андижонликлар ниҳоят, 19-турга келиб дастлабки очкосини қўлга киритдилар. Жиззахда “Сўғдиёна”га қарши учрашувда 1:1 ҳисоби қайд этилди. “Андижон” ярим ҳимоячиси Муҳаммадкарим Тоиров ҳимояда ҳам, ҳужумда ҳам жамоаси ўйинида боғламликни яхши бажарди ва учрашувнинг энг яхши ўйинчиси дея эътироф этилди.

“Металлург” – “Пахтакор” – 3:2. Энг яхши футболчи: Марко Миличкович

Чемпионатда ғалаба нималигини билмай келаётган “Металлург” “Пахтакор”га қарши учрашувда бетакрор камбэкни амалга ошириб, илк ғалабасини тантана қилди. Ҳисобни “Пахтакор” очганига қарамай, кейинчалик ўйин сурати ўзгариб кетди. Айниқса, баҳс якунига саноқли сониялар қолганида (90+8-дақиқада) “Металлург”нинг черногориялик ярим ҳимоячиси Марко Миличкович майдон марказига етмасдан “Пахтакор” дарвозасига супер гол урди. Бу катта эҳтимол билан йил голига айланади. Мана шундай гол урган ва жамоасига чемпионатдаги илк ғалабани тақдим этган футболчи энг зўри бўлиши табиий.

“Олимпик” – “Динамо” – 0:3. Энг яхши футболчи: Жоэл Кожо

Ўйин олдидан “Динамо” ва Кожо ўртасидаги вазият асосий мавзуга айланганди. Легионер ҳужумчига Эроннинг “Истиқлол” клубидан аниқ таклиф тушгани, бироқ “Динамо” бунга рози бўлмагани фонида футболчи бундан қаттиқ ранжиганини изҳор қилганди. Ўйин арафасида эса томонлар келишиб олишди. Натижада аразлаган Жоэл ўйинга яна юқори иштиёқ билан майдонга тушиб, гол ҳам урди. Жамоаси эса йирик ҳисобда ғолиб чиқди. Ўйиннинг энг яхши футболчисига ҳам айланди. Учрашувдан сўнг футболчи ҳам, Абрамов ҳам ҳаммаси жойида эканлигини таъкидлашди.

“Сурхон” – “Бунёдкор” – 0:1. Энг яхши футболчи: Нажмиддин Нормуродов

Самарқандда бўлиб ўтган “Сурхон” ҳамда “Бунёдкор” ўртасидаги учрашувда ягона гол ўйин тақдирини ҳал қилди. Меҳмонлар ҳимоячиси Нажмиддин Нормуродовнинг голи “Бунёдкор”га сафарда жуда қимматли ғалабани тақдим қилди. Иккинчи даврада натижаларини яхшилаб бораётган “Қалдирғочлар” мавқеини тиклаш жараёнида. Нормуродов эса “Сурхон” билан учрашув қаҳрамонига айланди.

"Насаф" - ОКМК - 2:0. Энг яхши футболчи: Жавоҳир Сиддиқов

Чемпионлик учун асосий даъвогар бўлиб турган "Насаф" бу турда энг яқин таъқибчиси ОКМКни қабул қилди ва 2:0 ҳисобида рақибини енгиб, ҳеч қандай имконият қолдирмади. "Насаф" чемпионлик учун яна катта қадам ташлади. Биринчи бўлимда мезбонлар ярим ҳимоячиси Жавоҳир Сиддиқовнинг дубли "Аждарлар"га уч очкони тақдим қилди. Натижада учрашув қаҳрамонига айланган Жавоҳир энг яхши ўйинчига айланди.

Шуҳратбек Жўраев.