Диоманденинг “Реал”га трансфери нега кечикяпти?

«РБ Лейпциг» вингерии Ян Диоманде «Реал Мадрид»га ўтиши кутилганидан кўра кўпроқ чўзилмоқда. Сабаб – футболчининг ҳозирги ва собиқ агентлари ўртасидаги можаро.

Кот-д’Ивуар терма жамоаси ўйинчисининг ишлари билан аввал шуғулланган Maxidel Management компанияси ФИФАга расмий шикоят аризаси киритди. Унга кўра, ҳозир футболчи манфаатларини ҳимоя қилаётган Roc Nation агентлиги шартномани бузгани, шу билан бирга «Реал Мадрид» билан музокараларда қонуний чекловларни четлаб ўтаётгани иддао қилинмоқда.

Маълумотларга кўра, Диомандега умумий битим шартлари ва миқдори аниқлаштирилгунча вақтинчалик лицензия берилиши мумкин. Ҳар икки клуб ҳам жараённинг максимал даражада очиқ ва шаффоф бўлишидан манфаатдор, чунки ҳақ тўловларини нотўғри агентликка ўтказиш молиявий жарималарга олиб келиши эҳтимоли бор.