Диоманденинг "Реал"га трансфери нега кечикяпти?

Германияда фаолият юритаётган машҳур журналист ва инсайдер Флориан Плеттенберг ўзининг ижтимоий тармоқдаги саҳифасида Кот-д’Ивуар терма жамоаси вингери Ян Диоманденинг «РБ Лейпциг»дан «Реал»га ўтиши нега кечикаётгани ҳақида маълумот берди.

Унинг маълум қилишича, «РБ Лейпциг» ҳозирча «Реал»нинг Диоманде  бўйича сўнгги таклифига жавоб қайтаришни истамаяпти. Шу боис мадридликлар ҳали расмий равишда янгиланган таклиф юбормаган. Клублар трансфер суммаси юзасидан келишувга эриша олмаётгани айтилмоқда. Шу билан бирга, музокаралар тўхтаб қолгани ёки битим бекор бўлгани йўқлиги алоҳида таъкидланмоқда.

Аввалроқ оммавий ахборот воситаларида Ян Диоманде «Реал»нинг янги футболчисига айланиши кутилаётгани ҳақида хабарлар тарқалган эди. Айтилишича, трансфер қиймати 100 миллион еврони ошиб кетади, клублар эса музокараларнинг якуний босқичида тургани қайд этилган. Инсайдерлар маълумотига кўра, «РБ Лейпциг» шу пайтгача «Реал»дан келган 100 миллион ва 115 миллион евро миқдоридаги икки таклифни рад этган.

Ян Диоманде «РБ Лейпциг» сафини 2025 йилдан буён ҳимоя қилиб келмоқда. У 2025/2026 йилги мавсумда жамоа таркибида 36 та ўйинда майдонга тушиб, 13 та гол урди ва 10 та голли узатма амалга оширди. Transfermarkt интернет-портали баҳосига кўра, футболчининг тахминий бозор қиймати 90 миллион еврога тенг. Унинг немис клуби билан амалдаги шартномаси яна тўрт йилга мўлжалланган. Яқинда ўтказилган жаҳон чемпионатида эса Ян тўртта ўйинда иштирок этиб, бир голли узатма қайд этди.