Диёр Имомхўжаев ҳозирги кундаги ҳакамлар ва ВАР ҳақида: "Олдин ўзбек футболида ҳакам хоҳлаган ишини қилган!"

УзФПЛ раҳбари ҳисобланган Диёр Имомхўжаев Ўзбекистон Миллий ахборот агентлиги билан бўлган суҳбат давомида ҳозирги кундаги ҳакамлар ва ВАРнинг ривожланишини алоҳида таъкидлаб ўтди. 
 
— Ҳакамлик мавзусига юзланмоқчиман. Ўтган мавсумда ҳакамликни яхши баҳоласа бўлади, айрим хатоларни инобатга олмаса. Бу мавсумда ҳакамликда қанақа янгиликлар бор? Билишимизча, ҳар бир стадионда ВАР техникаси бўлади. Клублар бунга қанчалик тайёр ва ҳозир ВАР техникалари ҳар битта стадионда ростдан ҳам борми? 
 
— Ҳамма нарса режа асосида кетмоқда. Бунга сабаб президент қарори бўлди. Ўша Президентимиз Миллий футбол марказининг очилишига борганда тақдимот қилиб берилган. Бу нарса тасдиқланган, ёққан. Ўзидан-ўзи келиб қолгани йўқ. Эсингизда бўлса, биз биринчи бўлиб буни Термизда синаган эдик. Яъни ВАР техникаси катта машинанинг ичига ўрнатилган бўлиб, у ўйинлар бўладиган ҳудудларга қатнарди. Энди бизда Термиз, Хоразм, Нукусга Тошкентдан етиб бориш маълум вақт талаб қилади. Шунинг учун Термизда синаб кўрган эдик — стадионнинг ўзига ВАР ўрнатилган. Кейин ўтган йили худди шунақа нарса Хоразмда синаб кўрилди. Суперлигага чиққандан кейин Хоразмнинг ўзига ўрнатилди ва бу нарса нисбатан эффекти кўпроқлиги тан олинди. Шунинг учун қарор кўринишида ҳар битта стадионга ўрнатиш бошланди. Эндиликда ўша Миллий футбол марказида алоҳида ВАР маркази бўлади. Қолган стадионлардан тўғридан-тўғри уланади. Шу ернинг ўзидан марказлаштирилган ҳолатда бошқариш йўлга қўйилади. Бу — катта енгиллик. Ўйлайманки, Худо хоҳласа яхши иш беради. Ва албатта, ВАР яхши ишлаши бевосита трансляция билан боғлиқ жараён. Мисол учун, йиллар давомида тўртта камера билан суратга туширилган. Ҳозирги ҳолатда биз МТРК билан ҳам келишдик. Келаётган мавсумда тўртта камера суратга туширадиган ўйинлар кескин камаяди. Иложи борича минимал талабимиз еттита камера бўлди. Еттита камера билан ўйинни олиб бергандан кейин, ВАРда ишлаётган одамларнинг ҳам меҳнати яхшироқ бўлади ва бу ўйинларнинг савияси ҳамда ҳаққонийлиги яна ҳам ошишига олиб келади. Олдин ўзбек футболида ҳакам хоҳлаган ишини қилган. Қачон ҳакам хоҳлаган ишини қилади? Агар у ўйин трансляция қилинмаётган бўлса. Ўзининг пайтида бунақа камералар бўлмаган. Ҳакам нима деса ҳақ бўлган, уни исботлаб бера олмагансиз. Телетранслация бўлганидан кейин масъулият ошади, чунки уни ҳамма кўриб турибди. Ҳакамнинг ҳам иккита боши йўқ-ку. Ўшанга қараб кетиляпти, Худо хоҳласа. 
 
— Ва ўзи умуман ҳакамликдан кўнглингиз тўляптими? 
 
— Мен максималист одамман. Кўнглим тўляпти десам, алдаган бўламан. Тўлмаётган жиҳатлари кўп. Лекин реалист сифатида ҳам фикр билдирсам, мисол учун, АПЛни ҳам кузатаман, Ла Лига ёки бошқа мусобақаларни ҳам — ҳакамлик жуда кўп жойда муаммоли барибир. Яқинда Винисиус билан бўлган вазиятни ҳам эслаб ўтдингиз. Мисол учун, "Манчестер Сити" — "Ливерпул" ўйнаяпти, нечта камера билан олиб берилади. Барибир ҳакамга саволлар кўп. Ҳакамликда доим шунақа бўлади. Одамларимиз фақат бизда шунақа деб ўйламаслиги керак. Мен ҳакамларни оқлаш учун айтмаяпман. Ҳужумчи бирга-бир вазиятдан фойдалана олмайди, баъзи футболчилар бўш қолган дарвозага гол ура олмайди. Дарвозабон хатоларга йўл қўйиб гол ўтказганидек, ҳакам ҳам хато қилади. Бизнинг курашишимиз керак бўлган нарса — принсипиал, атайлаб, қасддан қилинадиган хатоларни максимал даражада олдини олиш. Ҳозирги ҳакамликнинг ўртасида ер билан осмонча фарқ бор. Лекин камчиликлар борлигини ҳам тан олишимиз керак. 
 
— Айнан кўнглингиз тўлмаётган жиҳатларни айтиб ўтиб кета оласизми?

— Мен ҳаммасини битта-битта айтиб ўтиш ниятим йўқ. Бу жуда майда деталлар ва жуда кўпчилигини ўзимиз ҳал қилишимиз керак. Жуда кўп семинарлар бўляпти, бу йил Ассоциация билан ҳамкорликда IFAB'нинг техник директорини чақирдик, Давид Эллерай келди. Биз хоҳлаётган нарса — олдин қанақадир қоидаларга ўзгартириш киритилса, энг охири бўлиб хабар олганмиз. Биз биринчи бўлиб биздан бошлаш даражасига чиқмоқчимиз. Биз кўп нарса бўйича биринчи бўлмоқчимиз. Нимадир синаб кўриш керакми? Футболга янги қоида киритиляптими? Ёки ўйин вақтини чўзишга олиб келадиган, ҳалол бўлмаган ўйин тарафдорларини максимал даражада йўқ қилиш бўйича деган талаб қўйяпмиз. Шунақа даврларга етказганига шукр. Биз ташаббускор бўлган, ҳамма нарсада ўз гапимиз, ўз принципимиз бор бўлган ташкилотга айландик.