Диёр Мирзабоев: Футболчиларнинг савияси тўғри келмайди, деган гапга қўшилмайман

“Андижон” клуби ушбу турда ўз майдонида “Металлург”га 0:2 ҳисобида имкониятни бой берди. Учрашувдан кейин ташкил этилган матбуот анжуманида “Андижон” жамоасининг катта мураббийи Диёр Мирзабоев қатнашиб, журналистларнинг саволларига жавоб қайтарди. Аввало, у ўйин ҳақидаги фикрлари билан ўртоқлашди.

- Ҳозирдан бирор нима десам худди баҳонага ўхшаб туюлиши мумкин, - дея гап бошлади, катта мураббий. - Мағлубиятимизда эса дарвозабонни айбламаган бўлардим. У ҳали ёш, ҳамма ҳам хато қилади, фақат Парвардигор хато қилмайди. Хабаринглар бор, жамоамизга янги бош мураббий – Виктор Кумиков келган. Унинг футболга ўз қарашлари ва фалсафаси бор. Тўғриси, ўзининг фикри ва ўйинини футболчиларга тўлиқ етказгани вақт етмаяпти. Ўйиндан-ўйинга ўсишга ҳаракат қиламиз. Бугун ғалаба қозонишни роса хоҳлагандик. Афсуски...

- Янги бош мураббий келгани билан таркибдаги футболчиларнинг малакаси ва савияси етарли даражада бўлмаса, барибир қийин. Шуни ҳисобга олганда, ҳозирги вазиятдан қандай қилиб чиқиб кетмоқчисизлар?

- Фақат меҳнат қиламиз, ўйинларни кўриб таҳлил қиламиз. Керакли хулосаларни чиқаргандан сўнг камчиликлар устида ишлаймиз. Лекин футболчиларнинг савияси тўғри келмайди, деган гапга қўшилмайман. Ҳаммаси Суперлигада ўйнаган, келажаги порлоқ йигитлар.

- Биринчи даврадан кейин таркибга тажрибали ўйинчиларни қўшиш режада борми?

- Ҳа, ниятимиз бор. Трансфер ойнаси очилишига ҳали вақт бор. Тажрибали футболчиларни олиш учун аввало шартномаларига қараш керак. Чунки амалда битими бор футболчиларни қўлга кирита олмаймиз. Кўз остимизга олиб қўйган ўйинчиларни таркибга қўшиб олишга ҳаракат қиламиз. Ҳар битта чизиқни кучайтиришни ният қилганмиз. Бу борада бизнинг рўйхатимиз бор. Ҳозирдан селекция ишлари олиб борилмоқда.

- Кумиков келганидан кейин жамоа ўйинида қандайдир ўзгаришни сезяпсизми?

- Унгача ҳам бизда бош мураббий бўлган ва у билан ҳам бирга ишлаганмиз. Иккаласининг футболга қарашлари бошқача. Ҳозирча янги мураббий у қадар катта ўзгаришлар қилгани йўқ. Боя айтганимдек, унга ўзининг фалсафаси ва ўйинини мослаштиргани вақт керак.

- Умуман олганда, “Андижон” қачон ғалаба қозонади деб ўйлайсиз?

- Ҳозирги ҳолатда клубдаги ҳамманинг нияти шу, ғалаба қозониш. Аммо биргина ниятнинг ўзи етмаслигини ҳам тушуниб турибмиз. Шунга яраша қаттиқ меҳнат қилиш керак. Ҳар бир ўйинга ғалаба қозонишни мақсад қилиб тушамиз. Кўряпсиз, қаердадир омад етишмаяпти, балки руҳий босим бўлиши ҳам мумкин. “Бухоро” билан ўйиннинг охирги сонияларида гол ўтказиб, тайёр ғалабани қўлдан чиқариб юборганимиз ҳам таъсир қилгандир. Қанча тез ғалабага эришсак, шунча тез ўзимизга келамиз.

- Кумиков келгач, бунинг ижобий томони бўлдими?

- Ҳар бир жамоада мураббий алмашса, яхши томонга ўзгариш ҳам бўлади ёки қандайдир минус томонлари бўлиши ҳам мумкин. Биз эса ҳозирча яхши жиҳатларимизни кўрсата олмаяпмиз. Лекин сизларни ишонтириб айтаманки, Европа майдонларида ишлаган мураббийнинг савияси кучли. Умуман, мураббий келгач, яхши томонга ўзгаришлар ҳам бор. Шу билан бирга футболчиларимизга тушунтира олмаётган жиҳатларимиз ҳам йўқ эмас. Умуман, олдинги ва ҳозирги мураббийни ҳам ўз ишининг усталари деб ҳисоблайман. Ҳаммасини вақт кўрсатади.

- Икки турдан бери захирадан майдонга тушаётган футболчилар ўйинни кучайтира олишмаяпти? Бунга сабаб нима?

- “Бухоро” билан ўйиндан кейин ҳам шундай савол беришганди. Ҳар бир мураббий ўйинга захира вариантларини тузиб қўяди. Захирамиздаги ўйинчиларга ҳам майдонга тушганда ўйинни кучайтириш борасида уқтирганмиз ва рақибнинг кучли ҳамда кучсиз томонларини тушунтирганмиз. Афсуски, ҳозирча ўйлаганларимиз иш бермаяпти. Лекин кимнидир яхши ёки ёмон ўйнади деб ажратиб кўрсатмоқчи эмасман. Аммо ҳали захирадагилар ўйинни кучайтира олишмаяпти. Аслида ҳозирги жамоа кимники бўлади? Қишда тайёрлаган мураббийники бўлади. Чунки Хомяков қишки йиғинда жамоани ўзи тайёрлаган. Айни пайтда мураббийнинг айрим позициядаги футболчиларга эътирози бор. Янги мураббий ҳар доим ўйинчиларга албатта ғалабалар ҳам келади деб айтади.

- Қанот ўйинчилари – Азамат Исроилов билан Фарҳод Мираҳматовнинг ўйинига қандай баҳо берасиз?

- Ўйиннинг эртасига видеозаписни кўриб чиқамиз. Ана шундан сўнг бирор нима айта оламан. Ҳозир эса ҳиссиётда нимадир дея олмайман.

 

Матнда хатолик топсангиз, ўша хатони белгилаб, бизга жўнатинг (Ctrl + Enter)

Минбар

Барча блоглар