Дониёр Абдуманнопов: "Барча футболчилар учун фаолиятида янги саҳифа очилади"

“Андижон” клубининг қишки селекциядаги илк трансферига айланган Дониёр Абдуманнопов янги мавсумда яна ўзининг қадрдон жамоаси либосида тўп суради. Унинг қайтганида табиийки мухлислар ҳам мамнун бўлдилар.

24 ёшли футболчи 2024 йилги мавсумда “Пахтакор” таркибида Суперлига, Кубок ва ОЧЛ баҳсларида ҳаммаси бўлиб 24 та учрашувда майдонга тушди ва рақиблар дарвозасига 4 та гол уриб, 4 та ассистни амалга оширди.

Дониёр бутун диққат-эътиборини яна “Андижон”га қаратган. Унинг мақсадлари катта. “Андижон” матбуот хизмати эса Абдуманноповдан интервью олди.

- Дониёр “Андижон” клубига қайтганингиз билан табриклайман. Қачондир қайтишингиз ҳақида ўйлармидингиз?

- Жамоамга қайтганимдан хурсандман. “Андижон”га қайтишга доим тайёр бўлганман. Шунинг учун келдим ва қайтганимдан хурсандман.

- Бунгача “Навбаҳор” ва “Пахтакор” билан ОЧЛда тўп сурдингиз. Энди “Андижон” сафида ҳам ОЧЛда иштирок этиш имкониятига эгасиз. “Бургутлар”ни халқаро майдонда қандай тасаввур қиляпсиз?

- Албатта, жамоа ОЧЛда биринчи марта иштирок этади. Ўйлайманки, барча футболчилар учун фаолиятида янги саҳифа очилади. Имкониятлар бўлади, мухлислар билан ажойиб атмосферада икки баробар куч билан ҳаракат қиламиз. Худо хоҳласа, максимал даражада курашамиз.

- Олдин “Андижон”да ўйнаганингизда ёш, иқтидорли Абдуманнопов эдингиз, энди эса тажрибали Абдуманнопов сифатида қайтдингиз. Бу борада нима дея оласиз?

- Ҳа, илгари “Андижон”да ўйнаган пайтларим энг зўр даврлар бўлган. Жамоадан кетаётганимда “Бобур арена”да мухлислар билан хайрлашгандим. Ҳозир эса яна ўша хайрлашган ишқибозлар олдида тўп суриш жуда ёқимли.

- Мухлислар сиздан кўп нарса кутишяпти. Уларни хурсанд қилиш учун қандай гапингиз бор?

- Уларни хурсанд қилиш учун сизлар энг зўрисизлар. Биз эса майдонда хурсанд қилишга ҳаракат қиламиз.

- “Пахтакор”даги фаолиятингиз нимаси билан ёдда қолди, сизда?

- “Пахтакор” ўз номи билан “Пахтакор”. Мен ҳали бундай ҳар томонлама профессионал клубда ишламадим. Бир йил ичида ўзим учун керакли кўп нарса олдим. Клубдаги ҳамма мухлисларга раҳмат айтаман.