"Дрейклашаётган" Неймар ёхуд танқидларга муносиб бўлган юлдуз

Неймар учун мавсум анча омадли бошланди ва футболчи кўплаб голлар уриб, ажойиб сермаҳсуллик намойиш этаётганди. Ҳатто Бразилия билан у Жаҳон чемпионатида зафар қучган тақдирда, ниҳоят "Олтин тўп"га эга чиқиши айтилаётганди. "Бу адолатдан бўлар эди", дея кўпчилик таъкидлади ҳам. Бироқ нега? Ўз ишига ҳеч қачон катта маъсулият билан ёндашмайдиган ва профессионализмни қўпол тарзда бузувчи хатти-ҳаракатларга эга футболчи бу қисматга юз фоиз ҳақли. 

Шу йили бразилияликни ПСЖнинг энг катта муаммоси, деб атаган эдим. Мухлислар Париж клубидаги ўйинлари туфайли Леони ҳам кўп танқид қилади. Бироқ 35 ёшли Месси ҳам парижликларнинг 31 ёшли "қарияси"дан фойдалироқ бўлиб турибди. 

Неймар атрофида яна бир кўнгилни хира қилувчи воқеа содир бўлди. Февраль ойи сўнггида у тўпиғидан жароҳат олиб, мавсумнинг қолган қисмини ўтказиб юбориши аниқ бўлди. Эндиликда, бразилиялик ҳозирдан дам олиш имконига эга. Бразилиялик вингернинг машғулотлари ҳам ранг-баранг. Карнавалларнинг доимий иштирокчиси ҳамда тунгги клубларда вақт ўтказишни ҳуш кўрувчи Неймар одатда қимор ҳам ўйнаб туради. Бугунги кун ҳам шундан мустасно эмасди. У ўз саргузаштларини казинода давом эттирди. Қизиқарлиси, у ўз иштирокини жонли трансляция қилди. 

Омад доимгидек Неймар томонда эмасди. 

Футболчи 1 миллион евро йўқотди. Бунинг учун атиги 2 соат керак бўлди, холос. Унинг бу пулни йўқотишга бўлган реакцияси ҳам эфирда кўрсатилди. Аввалига футболчининг кўзларида ёш пайдо бўлди, аммо унинг қайғуси узоққа чўзилмади ва ўз омадсизлиги унинг кулгусига сабаб бўлди. 

Неймарнинг покерга бўлган муҳаббати ҳақида қисқача 

ЖЧ-2014 вақтида бразилиялик покерчиларни томоша қилади. Кейинчалик эса улардан сабоқ олишни бошлайди. 

Ней "PokerStars Vegas Preliminary" мусобақасида зафар қучди ва 2016 йилда жаҳоннинг биринчи покер мусобақаси "World Series"да қатнашиш имконига эга бўлди. Бироқ худди шу саналарда Олимпиада ўтказилди. Унда Неймар финал учрашувида ҳал қилувчи пенальтини аниқ амалга оширди ва Бразиялия терма жамоаси билан илк бор олтин медални қўлга киритди. 

2018 йилда у "BSOP" турнирида деярли 300 иштирокчи орасида олтинчи ўринни эгаллади ва 21 000 доллар қўлга киритди. 



Умуман олганда, Неймар учун ушбу миқдордаги пулнинг йўқотилгани бахтсизлик ёки талофат эмас. Сабаби, унинг бир ҳафталик маоши айнан 1 миллион еврони ташкил қилади. 

Шундай бўлса-да, 31 ёшли футболчининг салбий одатлари доимо унга қарши ишлаб келган ва уни танқид қилишга асос ҳам бор. ПСЖ хайрлашмоқчи бўлаётган юлдузлари рўйхатининг энг юқори қаторидан ҳам айнан бразилиялик иқтидор эгаси ўрин эгаллаган. Бошқача бўлиши мумкинми? Ўз ишига бўлган ёмон ёндашув туфайли кўплаб мавсумларни омадсиз ўтказаётган футболчининг ҳар қандай жамоадаги ўрни йўқолиб бораверади. Ҳатто у Неймар бўлса ҳам. 

Қўшимчасига, энди унинг омадсизликлари нафақат футболда, балки, бошқа севимли машғулотларида ҳам давом этмоқда. 

                                                                                   

                                                                                                           Худайқулов Карим тайёрлади