Дунё гимнастикачилари Тошкентга келди

Пойтахтимизда бадиий гимнастика бўйича жаҳон кубогининг учинчи босқичи бошланди. Унда Ўзбекистон, Австралия, Австрия, Арманистон, Бельгия, Болгария, Қозоғистон, Хитой, Қирғизистон, Германия, Франция, Италия, Венгрия, Ҳиндистон, Нидерландия, Польша, Мексика, Озарбайжон, Япония, Филиппин, Сингапур, Сурия, Словения, Туркия, АҚШдан келган ва нейтрал мақомда иштирок этувчи AIN гимнастикачилар рақобатлашмоқда.

Нуфузли мусобақада “Париж-2024” Олимпиадаси чемпиони, германиялик Дарья Варфоломеев ҳамда гуруҳ машқларидаги чемпион – Хитой терма жамоаси қатори Ўзбекистон шарафини Осиё чемпиони, Ислом бирдамлик ўйинлари ва жаҳон кубоги босқичлари ғолиби, терма жамоамиз етакчиси Тахмина Икромова, шунингдек, қитъа миқёсидаги мусобақалар ғолибаси Анастасия Саранцева яккалик баҳсларида, гуруҳ машқларида эса Олимпия ўйинлари финалчилари: Мумтозабону Исхоқзода, Иродахон Содиқова, Эвелина Аталянц, Амалия Мамедова ҳамда Аделя Файзулина ва Мафтуна Зоировадан ташкил топган терма жамоамиз ҳимоя қилади.

Мусобақанинг фахрий меҳмони сифатида жаҳон ва Европа чемпионатлари совриндори, 2024 йилги Олимпиада финалчиси, словениялик Екатерина Веденеева таклиф этилган.

Ўзбекистон Республикаси Спорт вазирлиги, Миллий Олимпия қўмитаси, Тошкент шаҳар ҳокимлиги, Гимнастика федерацияси ҳамда “Ўзавтосаноат” АЖ кўмагида ташкил этилган жаҳон кубоги учинчи босқичи бошланди.

26 апрелда эса кўпкураш натижаларига кўра, жаҳон кубогининг илк ғолиб ва совриндорлари аниқланади. 27 апрель – мусобақанинг якуний кунида алоҳида йўналишлар бўйича ғолиб ва совриндорлар аниқланади.  

Маълумот ўрнида: жорий йилги жаҳон кубогининг илк босқичи апрель бошида Болгариянинг София шаҳрида ўтказилган бўлиб, унда Тахмина Икромова булавада кумуш, кўпкураш ва тўп билан чиқишда бронза медалларини қўлга киритган эди. Шунингдек, гуруҳ машқларида терма жамоамиз 3 тўп ва 2 ҳалқа дастурида кумуш медалга сазовор бўлган. Жаҳон кубогининг иккинчи босқичи 16-19 апрель кунлари Озарбайжоннинг Боку шаҳрида ташкил этилган.