Дзюдо. Ўзбекистон Улан-Батордаги турнирда кучли тўртликдан жой олди

Мўғулистон пойтахти Улан-Батор шаҳри мезбонлик қилган "Катта Дубулға" туркумига кирувчи нуфузли турнир якунига етди.

Уч кунлик мусобақа якунларига кўра, Ўзбекистон терма жамоаси медаллар жамғариш бўйича умумжамоа ҳисобида 4-ўринни эгаллади. Ўзбекистон давлат мадҳияси Мўғулистон заминида янгради. 

Абдураҳим Нутфуллоев (-66 кг)  "Ulaanbaatar Grand Slam 2025" чемпионига айланди. Бу билан у мусобақанинг кичик шов-шуви сабабчиси бўлди. Бу унинг "Grand Slam" туркумига кирувчи турнирлардаги илк медали эди. Ҳал қилувчи финал баҳсида жаҳон рейтинги пешқадамларидан бири, Париж-2024 Олимпиадаси бронза медали совриндори Денис Виеру (Молдова) устидан ғалабага эришди. Бу муваффақияти, яъни қўлга киритилган 1000 очко эвазига янгиланган жаҳон рейтингида 64-поғонадан 29-ўринга кўтарилиб олди. 

Умар Бозоров (-90 кг) —  "Ulaanbaatar Grand Slam 2025" турнирининг кумуш медалига сазовор бўлди. У ярим финалда ажойиб камбек эвазига россиялик Эдилсултановни мағлубиятга учратди. Финалда дзюдо ватани вакилига имкониятни бой берди. Бозоров 700 очко сабаб рейтингда 23-ўринга юқорилади. 

Ўткирбек Тўрабоев (+100 кг) бронза медали учун кечган беллашувда россиялик рақибга ютқазиб, мусобақани кучли бешликда якунлади.

Бу ҳақда Ўзбекистон дзюдо федерацияси матбуот хизмати хабар бермоқда.