ЕЧЛ.

“E”, “F”, “G”, “H” гуруҳларида 5 тур учрашувлари ўтказилади. Ушбу гуруҳлардан 2 тасида кейинги босқичга чиқувчи жамоалар номи муддатидан аввал аниқ бўлиб улгурган бўлса, қолган иккисида интрига ҳалигача авжида. 

Биз эса бугун сизлар билан ана шу ҳамма нарса аниқ бўлиб улгурган, бироқ мухлислари кўп бўлган жамоаларнинг ўйини ҳақида гаплашамиз: “G” гуруҳи. “Ференцварош” - “Барселона”, “Ювентус” - “Динамо Киев”.

“Ференцварош” - “Барселона”

ZjyFtJau

Гуруҳ аутсайдери ўз уйида пешқадам каталонларни меҳмон қилади. Бир қарашда деярли аҳамиятга эга бўлмаган ўйин сифатида кўзга ташланса-да, бу ўйин ҳам бир қанча қизиқарли жиҳатлари билан омма ва фанатлар эътиборини тортиши аниқ. Сабаби, “Барселона” янги мавсумда ички чемпионатдан кўра, ҳалқаро аренада муваффақиятлироқ ўйин намойиш этмоқда. Бунинг исботи сифатида уларнинг иккала турнирда тўплаган очколарига қараш кифоя. Ла Лигада 8 ўйинда 11, ЕЧЛда 4 ўйинда 12 очко тўплаган каталонияликлар мавсум бошида айрим муаммоларга учраганига қарамай, ҳозирга келиб анча ўзини тиклаб олди ва кетма-кет ўйинларда йирик ҳисобли ғалабаларни қайд этмоқда. Бугун эса улар Венгрияга асосий етакчиларисиз учиб кетишади: хўш, улар ғалабали юришини шу тарзда ҳам давом эттироладими ёки буни эплай олмайдими? 

"Ференцварош"

Венгриянинг 31 карра чемпиони бу мавсум ЕЧЛнинг ҳақиқий қийин гуруҳидан жой олди: “Барселона” ва “Ювентус” бор бўлган гуруҳдан кейинги босқичга ўта олишга уларнинг даражаси етмади. Лекин шундай бўлса-да, улар учун ҳали ҳаммаси тугагани йўқ. Жамоа Европа лигаси йўлланмасини қўлга киритиши ҳамда халқаро майдондаги юришини давом эттириши мумкин. Бунинг учун улар бугун “кўк-анорранглилар”дан очко олиши ва “Динамо" Киевнинг “Ювентус”га ютказишини тилаб туришлари лозим. Аммо барибир, асосий масала уларнинг ўзида, ютган тақдирда улар учун 3-ўрин кафолатланиши мумкин. Таркиб борасида эса муаммолар йўқ, ҳамма оптимал спорт формасида.

Тахминий таркиблар: Дибуш; Гейстер, Двали, Фримпонг, Давид; Зубков, Мюрто, Сомалиа, Нгуен; Ловренчич, Франк.

"Барселона"

“Барселона”да эса вазият бирмунча енгил, улар гуруҳни 1-ўрин билан якунлаб, кейинги босқичга чиқиш учунгина ўйнашлари мумкин. Куманнинг бу ўйинга муносабатини етакчиларга дам берганлигига қараб ҳам билиш қийин эмас. Нидерландиялик мураббий бугунги баҳс учун Будапештга жамоа юлдузлари Лео Месси, Филиппе Коутиньо ва Тер Штегенни олиб кетмади, уларга дам беришни маъқул кўрди. Бундан ташқари клубда бир қанча жароҳатдаги футболчилар ҳам мавжуд бўлиб, улар бугун жамоага ёрдам беролмайди: Пике, Роберто, Умтити, Фати ва Араухо. Кеча амалдаги чемпион “Бавария” иккинчи таркиби билан “Атлетико”дан очко олгани ёдингизда бўлса керак. Кўрамиз, бугун “Барса” ҳам аутсайдердан шундай таркиби билан очко ола билармикан?

Тахминий таркиблар: Нету; Альба, Мингеза, Бускетс, Дест; Пьянич, Аленя; Дембеле, Тринкау, Педри; Брейтуэйт.

EoPGFZhXcAEtNjU

“Ювентус” - “Динамо” Киев

Ушбу гуруҳнинг иккинчи ўриндаги жамоаси ўз уйида Киевнинг “Динамо”сини қабул қилади. Бу учрашувнинг биринчисидан фарқи, “Альянц арена”даги бахс фаворитнинг яққол устунлиги дарҳол кўзга ташланиши билан ажралиб туради. Жамоаларнинг ҳолати ҳақида сўз кетганда, “Ювентус”нинг ҳар томонлама устунлигини таъкидлашдан бошқа йўлимиз йўқ. Лекин, бошқа жиҳатдан қарасак, киевликларда Турин клубига қараганда мотивация кўпроқ. Демак, бошладик!

1500x500

“Ювентус”

Сўнгги 6 баҳснинг 4 тасида ғалаба, 2 тасида дуранг натижа қайд этган туринликлар ЕЧЛга оптимал спорт формасида ва қувноқ кайфиятда етиб келмоқда. Охирги марта “Юве” ЕЧЛ иккинчи турида “Барселона”га мағлуб бўлганди, шундан бери Пирло шогирдлари мағлубият кўчасига кирганича йўқ. Ҳар бир ўйинда гол урилмоқда ва энг муҳими 1/8 финал масаласи ҳал қилиб бўлинган. Шу сабабли, улар бугун босимсиз ва иложи борича кейинги ўйинларга куч тежаган ҳолда ўйнаши кутилмоқда. Жамоада (Кьеллини ва Демиралдан ташқари) деярли йўқотишлар йўқ, Пирло исталган таркибини майдонга тушира олади. Аммо, жамоа юлдузи Криштано Роналдунинг майдонга тушиши сўроқ остида қолмоқда.

Тахминий таркиблар: Буффон; Данило, Бонуччи, Де Лигт; Куадрадо, Маккенни, Бентанкур, Фработта; Кьеза, Кулусевски, Мората. 

EoPMi90WMAEVVzx

“Динамо” Киев

Умумий 4 ўйинда атиги 1 очко йиғишга муваффақ бўлган Киевликлар 5-турга кўплаб йўқотишлар ва жароҳатлар билан етиб келди. Гуруҳда қолиб кетиши аллақачон аниқ бўлиб улгурган клуб ҳозирда энг камида Европа лигаси йўлланмасига эга бўлиш учун ҳаракат қилишни мақсад қилган. Лекин бу осон иш эмас. Муаммоли таркиби билан эса бу янада қийинроқ кўринади. “Динамо” Беседин, Бурда, Буяльский, Диелунд, Костевич, Русин ва Тимчик сингари муҳим ўйинчиларисиз майдонга тушишга мажбур. Уларга бугун осон бўлмаслиги тайин. Кўрамиз, “Юве” муаммосиз 3 очкога эга чиқармикан ёки киевликларга ЕЛ йўлланмасини олиш учун ёрдамлашиб юборармикан…

Тахминий таркиблар: Бушан; Караваев, Попов, Забарний, Кедзиора; Шапаренко, Андриевский; Де Пена, Буяльский, Циганков; Вербич.

EoAlSw4XUAAd6h5

Ҳулоса ўрнида

Умумий олиб қараганда, биринчи учрашувда “Ференцварош”нинг имкониятлари ҳам юқоридек кўринмоқда, лекин биринчи турда будапештликларнинг “Барселона”га қарши деярли ҳеч нима қилолмаганини ҳам эслашимиз лозим. Шу туфайли, Куман шогирдлари бугунги баҳсда унчалик қийналмасликлари тахмин қилинмоқда. Бизнинг фикримизча, бугун меҳмонлар минимал ҳисобда ғалабага эришади. 

“Юве” бу ўйинда яққол фаворит, лекин ўтган мавсумда ана шундай мутлақ фаворит мақомидаги баҳслардан бир нечтасида юта олмай қолгани ҳалигача эсимиздан чиқмаган. Шу сабабли, ўйни ҳақида нимадир дейишиз қийин. Бизнингча, бугун “Юве” ўз сўзини айтади ва “Барселона” каби минимум ҳисобда ғалаба қозонади. Албатта, бу шунчаки тахмин, барчасини майдондаги вазият ҳал қилади. Бирга кузатамиз!

Абдулла Маннонов тайёрлади.

 

Матнда хатолик топсангиз, ўша хатони белгилаб, бизга жўнатинг (Ctrl + Enter)