ЕЧЛ. "Бавария", "Атлетико" ва "Манчестер Сити" иштирокидаги ўйинлар учун превью

Чемпионлар Лигаси гуруҳ босқичи янада қизғин палласига кириб бормоқда. Ўтган тур превьюларида ҳам худди шу фикрни такрорлаганимизни ҳушёр мухлислар пайқаб улгургандир. Дарҳақиқат, турдан-турга қизиб борадиган ЕЧЛ ҳақида бу таърифни қанча ишлатсак арзийди. 4-тур ўйинлари баъзи жамоаларга нимчорак финал йўлланмаларини туҳфа этишини ҳисобга олсак, ўйинларнинг қиймати ва қизиқарлилик даражаси ортади. Ҳозирги превьюмиздан кейинги босқич масаласини бугун ҳал этиши мумкин бўлган жамоалар ҳақидаги фикрлар ҳам ўрин олган. Демак, биринчи бўлиб "Бавария" - "Ред Булл" Зальцбург ўйини ҳақида.

photo_2020-11-25_13-06-12

"Бавария" - "Ред Булл" Зальцбург

2 мавсумдирки футбол оламига дахлдор барчани бир савол қийнамоқда: "Бавария"ни ким тўхтатади? Мессиси бор "Барселона", ҳужумидан исталган ҳимоя ҳадиксирайдиган ПСЖ, грандлар билан қандай ўйнаш кераклигини яхши биладиган Симеоне бошқарувидаги "Атлетико", Ҳоланд каби тўпурарга эга "Боруссия"лардан ҳеч бири мюнхенликларни тўхтатиб қола олмади. Айниқса, "Бавария" Чемпионлар Лигасида 14 ўйиндан бери ютқазмаётганлиги уларнинг қандай даҳшатли темпда бораётганлигидан дарак беради. Улар истаган жамоасига хоҳлаганча гол уряпти. Ўтган ўйинда "Бавария" меҳмонда "Ред Булл" дарвозасига 6 та гол урган. Шундан келиб чиқсак, бу ўйинда ҳам фаворит айнан "Альянц Арена" эгалари.

photo_2020-11-22_22-24-30

Тахминий таркиб: Нойер, Павар, Боатенг, Мартинес, Алаба, Горецка, Рока, Гнабри, Мюллер, Сане, Левандовски.

Ханс-Дитер Флик: "Кунлик машғулот жараёнларимиз менга жуда ёқяпти. Агар сиз буни шахсан томоша қилсангиз, муваффақиятларимиз калити шунда эканлигига гувоҳ бўласиз. Ёш истеъдодларга майдонда дақиқалар бераётганимиздан хурсандман. Улардан баъзиларини яқин келажакда кўришимиз ҳам мумкин. Одатда, ўйин тизгинини қўлга олишга уринамиз. Агар сиз буни уддалай олсангиз, бундан яхшиси йўқ. Агар эплолмасангиз, рақиб сизни катта босим остида қолдиради. Буни яхши биламан".

photo_2020-11-24_18-14-47

"Ред Булл" Зальцбург

Ўтган ўйин олдидан таъкидлаб ўтганимиздек, австрияликлар гол уришни ёқтиради. Улар гуруҳ босқичидаги 3 ўйинда 6 та гол урган. Бу кўрсаткич бўйича улар фақат "Бавария"дан ортда. Шунга қарамай, "Ред Булл" ўтган баҳсда мюнхенликлар дарвозасини ҳам 2 бор ишғол этганди. Шундай сермаҳсуллик намойиш этаётган Жесси Марш шогирдлари бугун ҳам рақиб дарвозаси қаршисида катта хавф туғдириши тайин. Боз устига, мезбонлар таркибида Зюле, Киммих, Толиссо, Дэвис, Эрнандес каби ҳимояга ихтисослашган футболчилар бу ўйинда иштирок эта олмайди. Демак, бу ўйиндан интрига топиш мумкин.

photo_2020-11-25_11-38-43

Тахминий таркиб: Станкович, Ульмер, Вебер, Рамальо, Кристенсен, Собослаи, Камара, Мвепу, Окафор, Койта, Бериша.

Жесси Марш: "Биринчи ўйинда улар билан бир даражада ҳаракат қила олишимизни кўрдик. Биз ҳамжиҳат ва кўпроқ интизомли ўйин кўрсатишимиз лозим. "Бавария" таркиби жуда кучли, улар кўп сифатларга эга. Бироқ бутун жамоа бўлиб уларни мағлуб этишимизга ишонамиз. Ажойиб стадионда кучли рақибга қарши ўйнаш ёқимли".

photo_2020-11-25_20-38-47

"Атлетико" - "Локомотив" Москва

"Матрасчилар"нинг кайфияти аъло даражада. Улар сўнгги учрашувда кимсан "Барселона"ни мағлуб этди. Шунингдек, 1 ойдан зиёдроқ муддатда уларни ҳеч ким юта олмаяпти. Демак, Симеоне ўз ишини уддаламоқда. Шогирдлари кўзида олов ёндира олган аргентиналик мутахассис бугун "темирйўлчилар"дан реванш олиши мумкин. Сабаби, улар Москвада муҳим очколарни қўлдан чиқарганди. Агар бу баҳсда мағлуб бўлган тақдирда, мадридликлар гуруҳ босқичида "Локомотив"ни олдинга ўтказиб юборади. Бу ҳолат беллашув қийматини ошириши аниқ.

photo_2020-11-25_19-30-35

Тахминий таркиб: Облак, Триппьер, Савич, Хименес, Лоди, Карраско, Коке, Сауль, Льоренте, Корреа, Жоау Фелиш.

Диего Симеоне: Бизни яхши қарши ҳужумга эга бўлган, тактик жиҳатдан кучли рақибга қарши жуда муҳим ўйин кутиб турибди. Биз ҳужум қилишимиз ва улардан аввал гол уришимиз лозим. Буни Москвада уддаладик. Бироқ бу тўлиқ бўлмади. Шунинг учун, бугунги баҳсда майдоннинг ҳар бир қаричи учун кураш кечади.

simeone

"Локомотив" Москва

Марко Николич шогирдлари биринчи ўйинда мадридликларга анча қаршилик кўрсата олганди. Супертемп намойиш этаётган мадридлик ҳужумчиларни тўхтатиш мобайнида ўзлари ҳам Облак постига йўл топа олишди. Шундай бўлса-да, "Ванда Метрополитано"да уларни жуда қийин баҳс кутиб турганлиги аниқ. Чунки плей-офф йўлланмалари учун қизғин кураш бормоқда. "Темирйўлчилар" олдида турган вазифа "Атлетико"ни мағлуб этиш ва нимчорак финал чипталари томон катта қадам ташлаш. Очко олган тақдирда энг камида, Европа Лигасида иштирок этиш учун яхши имконият ҳосил қилади.

photo_2020-11-25_20-43-57

Тахминий таркиб: Гильерме, Живоглядов, Чорлука, Мурило, Рибус, Рибчинский, Криховяк, Куликов, Миранчук, Эдер, Зе Луиш.

Марко Николич: "Агар дуранг ҳақида ўйласангиз, мағлуб бўлишингиз аниқ. Биз ғалаба учун ўйнаймиз. Ўтган ўйин жуда мураккаб кечганди. Ҳозир уларни Москвадаги учрашувга қараганда яхшироқ биламиз. Бизга тактик интизом керак. "Атлетико" бир неча йиллардан бери кучли ўйин кўрсатиб келмоқда".

loko trener

"Олимпиакос" - "Манчестер Сити"

Бир қарашда юнонлардан катта сенсация кутиш бироз қийин. Бироқ улар ўз уйида ҳаракат қилиши "Олимпиакос" очко олишини кутаётган мухлислар учун умид кўнғироғи ўлароқ хизмат қилади. Педро Мартинс шогирдлари айнан шу стадионда "Марсель"дан устун келган эди. Бугунги рақиб анча жиддий. Бироқ ҳар қандан жамоага қарши ўйнаш мумкин ва бугун грецияликлар буни исботлаш учун  майдонда саф тортишади. Боз устига, "шаҳарликлар" бу учрашувга принципиал баҳсдаги аламли мағлубиятдан кейин ташриф буюрмоқда. Моуриньо Грециядаги ҳамкасбига Гвардиолани 2 та зарба йўллаб, мағлуб этиш бўйича мастер-класс ўтаб берди.

photo_2020-11-25_20-47-36

Тахминий таркиб: Са, Дрегер, Семеду, Сиссе, Рафинья, М'Вила, Бухалакис, Камара, Пепе, Фортунис, Масурас.

Педро Мартинс: Бизда йўқотишлар бор. Бироқ ўларнинг ўрнини босувчи футболчиларимиз ҳам йўқ эмас. Биз ўтган ўйиннинг иккинчи бўлимидаги каби ҳаракат қилишимиз лозим. Ҳали кейинги босқичдан умид узганимиз йўқ. Учрашув бизнинг стадионда эканлиги руҳий устунлик беради.

800

"Манчестер Сити"

Юқорида таъкидлаганимиздек, "Сити"нинг кайфияти яхши эмас. Аввалига "Ливерпуль", кейинчалик "Тоттенҳэм" улардан очко олишга муваффақ бўлди. Охирги ғалаба эса, айнан "Олимпиакос"га қарши биринчи даврадаги тўқнашувда қўлга киритилган. Демак, кайфиятни ўз ўрнига қайтариш учун яхши имконият мавжуд. Шунингдек, бугунги ғалаба манчестерликларга плей-офф чипталарини тақдим этади. Бу ҳам қўшимча мотивация бўлиши табиий.

photo_2020-11-24_20-57-24

Тахминий таркиб: Эдерсон, Уокер, Диаш, Ляпорт, Канселу, де Брюйне, Родри, Гюндоган, Стерлинг, Жезус, Фоден.

Пеп Гвардиола: Уларни жуда қаттиқ ҳурмат қиламан. Рақиб ҳам худди биз каби кураш олиб боришига аминман. Бу ўйин совғаси сифатида плей-офф чипталари тикилган. Шунингдек, ғалаба қозониш жамоа кайфиятига ҳам анча ижобий таъсир кўрсатади".

0_Guardiola

Жавоҳир Азимов тайёрлади

Фикрлар

Фикр қолдириш учун авторизациядан ўтинг!