“Эл-класико” кўрсатиб берди: “Барселона” касал, Сетьен эса унинг давоси эмас

Херар Пике ўйиндан сўнг берган интерьвюсида биринчи таймда фаолиятидаги энг кучсиз “Реал”ни кўрганини айтиб ўтди. Балки, “Барса”нинг “бўлғуси президенти” айтган фикрлар ўринлидир. У ҳолда Пикенинг жамоаси ўша кучсиз клубга 0:2 ҳисобида мағлуб бўлганини қандай изоҳлаш мумкин?  “Барселона” касал!

Аввало, улар мадридликларнинг биринчи таймдаги хатоларидан сўнг устунликни қўлга ола билишмади, 3 та яққол вазиятдан унумли фойдаланишмади. Антуан Гризманнинг жарима майдончаси марказидан берган зарбаси тайёргарликсиз берилгани яққол билинди. Мессининг зарбалари дарвозага аниқ борган бўлса-да, улар у қадар кучли эмасди. Артурнинг зарбаси бельгиялик посбон томонидан қайтарилди.

Ундан ҳам хавфлироғи, иккинчи бўлимда Марсело ва Вальверденинг “саъй-ҳаракатлари” сабаб Месси “Сантьяго Бернабеу”ни жароҳат билан, бошини қуйи солиб тарк этди.

Мадридга улар 2 очко фарқ, “класико”лар статистикасидаги устунлик билан келишган эди. Энди уларда ҳеч бири йўқ. Муаммолар ҳал бўлиш ўрнига болалаб кетяпти. “Кўк-анорранглилар” ушбу мавсум Ла Лигада 13 та сафар учрашувидан атиги 1 тасида дарвозалари даҳлсизлигини сақлаб қола олишган. Ўтган йилнинг 1 декабрь куни муаммолари билан ўралашиб ётган “Атлетико”га қарши учрашувда улар буни уддалашган эди.

Месси ҳам жамоаси каби омадсиз мавсум ўтказмоқда. Аргентиналик форвард меҳмондаги 7 та баҳсда кетма кет гол ура олмади. Мессида бу каби ҳолат 2006-2007 йилги мавсумда кузатилганди. Бироқ у пайтда Леога “Барселона”да асосий таркиб кафолатланмаган эди.

“Барселона” ҳам 1974-1975 йилдан бери кетма-кет “класико”ларда нурсиз ўйин намойиш этмаётганди. Бундан ташқари, кечаги тўқнашув барселоналикларнинг Мадриддаги мағлубиятсиз сериясига нуқта қўйди. Дарҳақиқат, охирги йилларда “Бернабеу” “Барса” учун байрам майдонига айланиб қолганди. 2014 йилги Мадриддаги камбэкдан сўнг “Барселона” мухлислари орасида “БернаЛео” атамаси кенг қўлланиладиган бўлиб қолди. Ла Лига доирасидаги “Эл класико”ларда каталонияликлар 2006 йилдан бери “Бернабеу”дан голсиз қайтишмаган. Пикенинг сўзларига кўра, Мадридда ғалаба қозонишнинг қизиғи қолмаган.

Кўп нарсалар ўзгарди

Балки Кике Сетьен жамоада қолишга етарли даражада кучли мураббийдир. Аммо Вальверденинг истеъфосидан кейин клубнинг аҳволи яхши томонга ўзгардими? Фикримизча, йўқ! Месси “Реал” майдонида аввалгилардан ҳам ёлғиз кўринди. Ҳужум чизиғида унга муносиб шерик топилмаяпти. Тўғри, Гризманнга бўлган қизиқиш Луис Энрике давридан бери бор эди. Аммо Неймар кетиб, Дембеленинг ўйини ўхшамай қолгач, франциялик ҳужумчини клубга олиб келишди. Бироқ у ҳам Суареснинг ўрнини тўлақонли сездирмаяпти, дея олмаймиз. “Лучо”нинг “Барселона”си ҳимояда тўпни тепиб юборишни афзал кўрарди. Бу дарвозага яқин нуқтада тўпни йўқотишдан кўра яхшироқ. Муҳими, ҳужум бартараф этиларди.

Гризманнинг натижалари у жамоага мослашиб кетди деган фикрни уйғотиши мумкин. У “Наполи”га қарши чемпионлар лигаси ўйинида ҳам гол урди. Лекин барибир унда нимадир жойида эмас.

Сетьен тўп назоратини қайтара олди, лекин ҳали ҳам ҳужумда аниқ режа, тактик ишланмалар йўқ. Мураббий Мессининг мўжизаларига умид боғлайдиган ўйинни ташкил этмоқда. Мессининг ўзида ҳам натижалар ёмон. Сетьеннинг жамоаси Леога суяниб қолган бўлса, ҳолига вой. Уларнинг бахтига «класико»даги жароҳат жиддий бўлиб чиқмасин.

Goal.com сайтидан Абдулвосид ВАЛИХОНОВ таржимаси