Элдор Эронов: "Эдил Есенгулов билан жанг қилмоқчиман"

Маълумки, 7 январь куни MPL-7 турнири бўлиб ўтади ва унинг 2-марказий жангида икки ҳамюртимиз Элдор Эронов ҳамда Фарҳоджон Машрапов жанг қилади. 

Ярим ўрта (77,1 кг) вазн тоифасида октагонга кўтариладиган ҳар икки юртдошимиз ўртасидаги жанг қизиқарли ўтиш турган гап. Биз ушбу қарама-қаршилик ҳақида Элдор Эроновга бир нечта саволлар билан мурожаат қилдик.

- Muradov_Professional_Liga билан нечта жангга шартнома имзоладингиз?

- MPL да 4 та жанглик келишувга эришдик. 

- Айнан, Фарҳоджон Машрапов билан жанг қилиш имконияти қандай юзага келди?

- Аслида, Исломжон Камолиддинов билан жанг бўлиши керак эди. Бироқ, Исломжон бетоб бўлиб қолганлиги учун Фарҳоджон Машрапов заҳира жангчиси сифатида рақиб бўлди. 

-Умуман Машрапов ҳақида қандай фикрдасиз?

- Бу рақибим сўнги учта жангини Naiza FC да ўтказди. Ажойиб жисмоний ҳолатга эга. Бироқ, камчиликлар ҳам йўқ эмас. Шундан унумли фойдаланишга ҳаракат қиламиз. 

- Бу лигада 77,1 кг вазн тоифасида Шоҳасан Мирзаматов, Бобур Қурбонов, россиялик Ҳамзат Чапанов ҳаракат қилади. Шунингдек, қирғизистонлик Эдил Есенгуловни ҳам айтиш мумкин. Агар, навбатдаги жангингизда юқорида санаб ўтилганларни рақиб сифатида танлаш имкони берилса, қай бири билан жанг қилган бўлардингиз?

- Тўғриси, барчаси кучли жангчилар. Менда бундай имконият бўлса, Ҳамзат ёки Эдил Есенгуловни танлаган бўлардим. Агар, бу жангда ғалаба қозонсам, кейинги режаларни октагонда ошкор қиламан.