Элдор Шомуродовдан олдин МТЖ либосида сўнгги бор ким хет-трик қилганини эслайсизми?

"Navruz Cup" турнири финалида Ўзбекистон Угандани 4:2 ҳисобида мағлуб этди.

Ўйиннинг энг яхшиси бўлган Элдор Шомуродов ўз хет-триги билан терма жамоамизга ғалаба ва якунда соврин тақдим этди. Биз "оқ бўрилар" либосида сўнгги бор ким бир беллашувда 3 та гол урганини эслашга ҳаракат қилиб кўрдик.

2009 йилнинг 28 март санасида ўтказилган ЖЧ-2010 саралаш босқичидан ўрин олган Ўзбекистон - Қатар учрашувида шундай ҳолат кузатилган. "Пахтакор" стадиони мезбонлик қилган қарама-қаршилик вакилларимизнинг 4:0 ҳисобидаги ғалабаси билан якунланган.

Ўшанда Ўзбек футболи тарихидаги энг яхши ҳужумчилардан бири Фарҳод Тожиев 53 дақиқа ичида қатарликлар дарвозасини 3 бор ишғол қилган эди.