Элит Чемпионлар лигаси. "Истиқлол" - "Пахтакор": Учрашувни кимлар ўтказиб юборади?

Элит Чемпионлар Лигаси 5-турида "Пахтакор" 25 ноябрь куни Дубайда Эроннинг "Истиқлол" жамоаси билан тўқнаш келади.

Ушбу жамоа билан "шерлар" 2011 йил гуруҳ босқичида майдонга тушишган. Ўшанда Теҳронда "Истиқлол" 4:2, Тошкентда "Пахтакор" 2:1 ҳисобида ғалаба қозонган. 2020 йил нимчорак финалда Дохада "шерлар" 2:1 ҳисобида зафар қучган. Теҳрон клуби 9 марта Эрон чемпионати ва 7 бор Эрон Кубогида зафар қучган.

Охирги марта 2022 йил Эрон чемпионига айланган. Жамоани бу йилдан Жанубий африкалик мутахассис Питсо Мосимане бошқармоқда. "Пахтакор"нинг собиқ футболчиси Жалолиддин Машарипов айни пайтда ушбу жамоа сафида тўп тепмоқда. Беллашувни дисквалификация сабабли Эрон терма жамоаси аъзоси Рузбеҳ Чешми ўтказиб юборади. 

Эслатиб ўтамиз, "Истиқлол" ва "Пахтакор" жамоалари ўртасидаги Элит Чемпионлар Лигаси 5-тур баҳси 25 ноябрь, душанба куни Тошкент вақти билан соат 21:00да Дубайдаги "Ал Рашид" стадионида бошланади.