Энг кўп чемпион ва мухлис қайси стадионда қайд этилганини биласизми? Бошқа керакли маълумотлар ҳам бор. Ҳаммаси Ўзбекистон Суперкубоги ҳақида

Эртага, 27 февраль куни Яйпанда Ўзбекистон Суперкубоги бўлиб ўтади. Унда Суперлига чемпиони "Пахтакор" кубок соҳиби "Насаф" билан куч синашади. Беллашув 16:00да бошланади. Учрашув олдидан Суперкубок ҳақида маълумотларни тақдим этамиз.

Ўзбекистон Суперкубоги 1999 йили ташкил этилган. Унда кубок соҳиби "Навбаҳор" Фарғонада чемпион "Пахтакор" билан беллашган ва 4:2 ҳисобида зафар қучган. Ўйинга "Нефтчи" стадиони мезбонлик қилган, 6000 мухлис баҳс шоҳидига айланган.

Суперкубок йўлга қўйилгану, лекин давом эттириш жуда қийин кечган. Сабаби 2000-2013 йиллар ўйинлар ўтказилмаган.

2014 йили кубок ва чемпион саналган "Бунёдкор" олий лигада 2-поғонани банд этган "Локомотив" билан куч синашган ва "қалдирғочлар" битта тўп фарқидаги ғалабага эришган - 2:1. Ўйин Тошкентдаги "Жар" стадионида ташкил этилган. 4751 ишқибоз аренага келган.

Кейинги йили кубок эгаси "Локомотив" чемпион "Бунёдкор" ўйингоҳида 7200дан ортиқроқ мухлис қаршисида чемпион "Пахтакор"ни 4:0 ҳисобида тор-мор келтирган.

2016 йили "Насаф" ҳам кубокни қўлга киритгач, чемпион "Пахтакор"ни мағлубиятга учратган 1:0. Ўшанда "Бунёдкор" стадионига 4748 ишқибоз ташриф буюрган.

2017-2018 йиллар Суперкубок ўтказилмаган. 2019 йили Суперлига ғолиби "Локомотив" кубок соҳиби АГМКни 2:1 ҳисобида таслим этган. Беллашув "Пахтакор" стадионида 18000 мухлис қаршисида ўтказилган.

Ўтган йили "Пахтакор" қора анъанага барҳам бериб, “Насаф”ни Самарқандда доғда қолдирган. Ягона гол “шерлар”га илк суперкубокни тақдим этган. 4000 мухлис шоҳидлигидаи баҳс тақдирини Драган Чераннинг голи ҳал қилди.

Кўриб турганингиздек, "Локомотив" Суперкубокда 2 бор зафар қучган ҳолда ушбу совринни энг кўп қўлга киритган жамоа бўлиб турибди. "Навбаҳор" ушбу кубокнинг биринчи эгаси бўлса, охирги марта "Пахтакор" Суперкубокни ўзиники қилган. "Бунёдкор", "Насаф" ва “Пахтакор” бир мартадан совринга эришган.