Энг зўр тўпурар янги жамоага ўтди

Бундеслиганинг ўтган мавсумида энг кўп гол урган Никлас Фюллькруг фаолиятини Дортмундда давом эттирадиган бўлди.

“Боруссия” расмий сайти трансфер ойнаси ёпилиш арафасида “Вердер” форвардини ўз сафига қўшиб олганини маълум қилди.

Дортмундликлар 30 ёшли футболчи билан 2026 йилнинг 30 июнигача давом этадиган битим тузди. “Вердер” ўз форварди трансфери учун 13 миллион евро олди.

- “Боруссия” ўзига хос клуб. Мен шу клубга ўтишни орзу қилаётганим учун таклифдан жуда мамнун бўлдим. Бу жамоада ўйинчи сифатида янада ўсишим ва янги тажриба орттиришим учун яхши имконият бор, - деди Фюллькруг.

Тажрибали ҳужумчи “Вердер” сафида барча турнирларда 124  маротаба майдонга тушиб, рақиблар дарвозасини 49 марта ишғол қилган. Ўтган мавсумда Никлас 16 та гол билан Бундеслиганинг энг яхши тўпурари бўлди.

Бундан ташқари, Фюллькруг Германия терма жамоаси сафида тўққизта учрашувда еттита тўп киритиб, ажойиб статистика қайд этмоқда.