Эрик Тен Хаг МЮнинг супер камбеки ҳақида нималар деди?

Бугун тунда "Манчестер Юнайтед" "Астон Вилла" билан куч синашди. Унда "қизил иблислар" ирода намойиш этиб, 3:2 ҳисобида ғалаба қозонди. 

Мазкур беллашувдан сўнг манчестерликлар бош мураббийи Эрик Тен Хаг матбуот анжуманида ўз фикрлари билан ўртоқлашди. 

"Майдондаги атмосфера биринчи таймдаги ҳолатдан чиқиб кетишимизга катта таъсир кўрсатди. Илк бўлимда ҳақли тарзда икки тўп фарқи билан ютқазаётгандик. 

Танаффусда жамоамга: "Ишонишда давом этинг, қўлингиздан келганиданда кўпроқ ишни бажаришга ҳаракат қилинг", - дедим. Ҳисоб 1:2 кўринишига келганда, биз босимни янада кучайтирдик. Кейин нима бўлганини ўзингиз кўрдингиз. 

Учрашувдан олдин биз "Арсенал", "Ливерпуль" каби жамоалар билан беллашишимиз кераклиги ҳақида гапиргандим. Агар энг яхши ўйинимизни кўрсата олсак, ҳар қандай рақибни енга оламиз. 0:2 ҳисобида ютқазамизми ёки ундан ҳам йирикроқ ҳисоб бўладими, ғалаба учун охиригача ишониш ва ҳаракат қилиш керак", - деди нидерландиялик мутахассис.