Эрлинг Холанднинг отаси Норвегия – Англия ўйинидаги ҳакамликни танқид қилди

Норвегия терма жамоаси ҳужумчиси Эрлинг Холанднинг отаси, миллий жамоа собиқ аъзоси Альф-Инге Холанд фикрича, ҳакамлар хатоси Норвегия ва Англия терма жамоалари ўртасидаги жаҳон чемпионати учрашуви натижасига жиддий таъсир кўрсатган. У бу ҳақда DAZN телеканалига берган интервьюсида сўз юритган.

Аввал хабар қилинганидек, Норвегия жаҳон чемпионати чорак финалида Англияга қўшимча вақтдан сўнг 1:2 ҳисобида мағлуб бўлди. Биринчи бўлимга қўшиб берилган дақиқаларда Англиянинг голи олдидан баҳсли вазият юзага келган эди. Норвегия дарвозабони Эрьян Нюланд дарвоза зарбасини амалга ошираётганда, майдон устида илиб қўйилган телекабельга тегиб кетди. Натижада тўп йўналишини ўзгартириб, Эллиот Андерсон оёқлари остига тушди ва у Англиянинг голли ҳужумига старт берди. Бу гол бекор қилинмади.

«Бугун ғалаба қозонган жамоа эмас, ҳакам бўлди, менинг фикрим шу. Оддатда ўйиндан кейин расмий шахслар ҳақида гапиришни ёқтирмайман, лекин шунча муҳим эпизодлар бир жамоа зарарига ҳал этилаётганда, бунга кўз юмиш мумкин эмас, – деди Холанд катта. – Уйин давомида бир қатор баҳсли қарорларни кўрдик ва ҳар гал шундай вазиятлар Англия фойдасига ҳал бўлаётгандек туюлди».

«Норвегия терма жамоасидан жуда фахрланаман, чунки улар бир дақиқа ҳам курашишдан тўхтамади. Турнирнинг энг кучли жамоаларидан бирига қарши жасорат, интизом ва ишонч билан ўйнашди. Англия терма жамоаси жуда кучли рақиб, уларни кейинги босқичга чиққани билан табриклайман. Лекин бу кечанинг асосий мавзуси футбол эмас, балки ҳакамлик бўлиб қолгани ҳиссидан қутула олмаяпман», – дея қўшимча қилди у.

Ярим финалда Англия 15 июль куни Аргентина терма жамоасига қарши майдонга тушади. Жаҳон чемпионати 19 июль куни якунланади.