Эрон бош мураббийи: Ҳимоявий ўйнадик, деб ўйламайман

Халқаро ўртоқлик учрашувлари доирасидан ўрин олган Ўзбекистон - Эрон баҳси 1:2 ҳисобида форсларнинг ғалабаси билан якунланди. Учрашувдан кейин ташкил этилган матбуот анжуманида меҳмонлар бош мураббийи Драган Скочич қуйидаги фикрларни билдириб ўтди:

"Аввало, федерацияларга раҳмат айтмоқчиман. Қийин вазиятга қарамай, яхши савияда ўйин ташкил этилган. Ўйин осон кечмади. Йигитларни ғалаба билан табриклайман. ОЧЛда ўйнаб, чарчаган футболчилар билан ўйнаш бироз қийинчилик туғдирди. 

Бизда тайёргарлик учун жуда кам вақт бўлди. Биринчи таймда 2 хил тактикада ўйнадик. Бу жамоа учун қийинчилик туғдирди. Биз бу майдонда қийинчиликка учрашимизни билгандик. Аммо бунга мажбур эдик. 

Иккинчи таймда тактик ўзгаришлар амалга оширдик. Аввало, консентрацияга эътибор қаратдик. 6 та ўзгариш амалга ошира олдик ва бу етарли бўлди. 

Ўзбекистон яхши жамоа ва бу биз учун яхши синов бўлди.

Биз ҳимоявий ўйнадик, деб ўйламайман. 4-1-4-1 тактикасида ўйнар экансан, ҳимоядаги ҳаракатларда бутун жамоа иштирок этади. Расмий ўйинларда 4-2-3-1 тактикасида ҳам ўйнашимиз мумкин. 

Бир неча кун аввал, Шомуродовнинг Италияга кўчиб ўтганини эшитгандим. Азмун эса юқорироқ даражадаги клубларга ўтишини хоҳлардим", - деди мураббий.