Бугундан Эрон дзюдо федерацияси номаълум муддатга Халқаро дзюдо федерацияси (ХДФ) байроғи остида ўтадиган ҳар қандай мусобақалар, тадбирлар ва ҳаракатлардан бутунлай четлатилди. Бунга сабаб эса ўтган ой Токиода бўлиб ўтган жаҳон чемпионатида Саид Муллаи билан содир бўлган воқеа сабаб бўлмоқда. 

Гап шундаки, ЖЧда -81 килограмм вазн тоифасида иштирок этган 2018 йилги жаҳон чемпиони Саид Муллаи ярим финалда исроиллик Саги Муки билан тўқнаш келиши керак эди. Спортчи ҳар қанча ҳаракат қилмасин, унга Эрон Миллий Олимпия қўмитаси ва спорт вазирлигидан қўнғироқ қилиб, татамига чиқмаслик қатъий буюрилган. Бордию исроиллик дзюдочи билан курашадиган бўлса, ўзи ва оиласини учун муаммо бўлиши айтилган. Табиийки, спортчи беллашувга чиқмади. Саги Муки эса якунда ушбу вазн тоифасида чемпионликни қўлга киритди. 

Мусобақадан сўнг Халқаро дзюдо федерацияси бу воқеликни беэътибор қолдирмади. Олиб борилган музокаралардан сўнг Эрон томонининг бу иши Халқаро ташкилотнинг, хусусан, Олимпия хартиясининг фаолиятига мутлақо зид, деб топилди ва Эрон дзюдо федерацияси ХДФнинг барча тадбирларидан четлатилди. Қуйидаги видеода спортчининг ўзи бўлиб ўтган воқеани батафсил гапириб бергани баён этилган.