Эртак тугаш арафасида! Варди "Лестер"ни тарк этишини эълон қилди

13 йиллик фаолиятидан сўнг Жейми Варди "Лестер Сити"ни тарк этади. Футболчи бу ҳақда ўз инстаграм саҳифаси орқали маълум қилди.

Бундан 13 йил аввал форвард "Флитвуд Таун" жамоасидан 1 миллион фунт стерлинг эвазига "Лестер" таркибига келиб қўшилганди. Ушбу давр мобайнида у жамоа билан Премьер-лига, Чемпионшип (2 марта) ва Англия кубоги каби турнирларда зафар қучган.

Жейми "тулкилар" сафида 494 ўйинда 198 та голни ўз ҳисобига ёзиб қўйган. Шунингдек, шахсий совринлари қаторида у 2019-20 йилги мавсумда АПЛ олтин бутсасини қўлга киритган. Бундан ташқари, 2015-16 йилги мавсумда "мавсумнинг энг яхши футболчиси" соврини билан мукофотланган.

Маълумот ўрнида, якунланиб бораётган мавсумда "Лестер" 33-турдан сўнг 18 очко жамғарган ҳолда, мусобақа жадвалининг 19-ўрнида бормоқда. Таъкидлаш жоизки, жамоанинг кейинги мавсумни Чемпионшипда ўтказиши муддатидан аввал аниқ бўлиб улгурган.