"Евро-2020" арафасида Польша терма жамоаси яна бир жиддий йўқотишга учради

Польша терма жамоаси ҳужумчиси Аркадиуш Милик Европа чемпионатида ўйнамайди. Бу ҳақда мамлакат футбол федерацияси расмий сайти хабар бермоқда.

Ҳужумчи терма жамоанинг ўқув-машғулот йиғинига жароҳат билан етиб келган ва икки ҳафта давомида ушбу жароҳатидан даволанишга ҳаракат қилган. Аммо бугун ўтказилган тиббий текширувлардан сўнг, Миликни тўлиқ юкламада ўйнашга тайёр эмаслиги аниқ бўлди. Шу сабабли у терма жамоа қароргоҳини тарк этди.

Польша терма жамоаси бош мураббийи Паулу Соуза Миликнинг ўрнига ҳеч кимни чақирмасликга қарор қилди.

Олдинроқ жароҳати туфайли яна бир ҳужумчи - Кшиштоф Пёнтек ҳам “Евро-2020” қайдномасига киритилмаган эди.

Польша терма жамоаси мусобақанинг “E” гуруҳида Словакия, Испания ва Швецияга қарши баҳс олиб боради.