"Evro-2020" oldidan terma jamoalar uchun zo‘r xushxabar e’lon qilindi

“Evro-2020” uchun terma jamoalarning qaydnomasiga qoidaga ko‘ra 23 ta futbolchi o‘rniga 26 futbolchi kiritilishi mumkin. Bu haqda The Times nashri xabar bermoqda.

UEFAning milliy terma jamoalar bilan ishlar bo‘yicha qo‘mitasi bu qarorni koronavirus pandemiyasi tufayli qabul qilgan. Kengaytirilgan qaydnoma jamoa a’zolari koronavirus bilan zararlangan taqdirda, tarkibni tanlash borasida murabbiylarga qulaylik yaratadi.

Evropa chempionati aslida o‘tgan yili o‘tkazilishi kerak edi. Ammo Covid-19 keng tarqalishi sababli UEFA qit’a birinchiligini 2021 yilga qoldirdi. “Evro-2020” o‘yinlari joriy yilning 11 iyunidan 11 iyuliga qadar 11 shaharda bo‘lib o‘tadi.

UEFA hozirda mezbon shaharlar bilan stadionlarga muxlislarni imkon qadar ko‘proq kirishiga ruxsat berish masalasida muzokaralar olib bormoqda.