“Ливерпуль” Ҳусановдан ўтолмаган юлдузни сотади
Нидерландиялик машҳур ҳужумчи Коди Гакпо жорий мавсум якунланганидан кейин “Ливерпуль” клубини тарк этиши кутилмоқда. Журналист Уилсон Кокс маълумотига кўра, клуб 26 ёшли ўйинчини ёзда сотиш вариантини кўриб чиқмоқда.
Жорий чемпионатда чемпионлик унвонини сақлаб қола олмаган мерсисайдликлар келаси мавсум олдидан таркибини жиддий тарзда қайта кўриб чиқади ва катта ўзгаришларни амалга оширишни режалаштириб қўйган.
Манбанинг таъкидлашича, Гакпо клубни биринчилардан бўлиб тарк этадиган номзодлар рўйхатига киритилди.
Коди Гакпо аслида Нидерландиянинг энг қудратли клубларидан ҳисобланган ПСВда тарбияланган ва профессионал фаолиятини айнан шу жамоада бошлаган.
“Ливерпуль” қанот ҳужумчисини 2023 йилнинг январь ойида 42 миллион евро эвазига ўз сафига қўшиб олди ва у билан 2030 йилнинг 30 июнигача давом этадиган шартнома имзолади.
Жорий мавсумда Гакпо барча турнирларда 34 та учрашувда иштирок этиб, рақиблар дарвозасига еттита тўп киритди ва жамоадошларига тўртта голли пас узатди.
Яқинда Англия Премьер-лигаси доирасида Ўзбекистон миллий терма жамоаси ҳимоячиси Абдуқодир Ҳусанов “Манчестер Сити” таркибида нидерландиялик ҳужумчига қарши ўйнаб, унга гол уриш имконини бермади.
Абдуқодир ўйинда айнан Гакпо билан кураш чоғида юзидан зарба олди. Бу вазиятда тўпга чиққан дарвозабон Жанлуижи Доннарумманинг тиззаси Ҳусановнинг юзига тегди.
Ўзбек футболчисининг ўз саломатлигини хатарга қўйиб бўлса-да, “Ливерпуль” ҳужумчиларига гол уриш имконини бермагани “Манчестер Сити” мухлисларининг Абдуқодирга бўлган меҳрини жўштириб юборди.
Фикрлар