Европа Чемпионлигини қўлга киритган бошқа миллат вакилларидан тузилган рамзий жамоа! Улар орасида Африка, Жанубий Америка ва Ўзбекистонда туғилган футболчилар ҳам бор?!

Ортда қолган 15 мусобақада 10 терма жамоа ғолиблик шоҳсупасига кўтарилган. Германия ва Испанияда 3 тадан олтин медалга эга бўлган бўлса, Франция икки бор қитъада тенгсиз, деб топилган. СССР, Чехословакия, Нидерландия, Дания, Греция ва Португалия бир маротабадан чемпионликни нишонлаган.

2004 йилда Греция терма жамоаси билан сенсацион равишда турнирда тенгсиз бўлгани ёдингиздан кўтарилмагани аниқ. Юнонларнинг «олтин авлоди» сафида Ўзбекистонда туғилган Димитриос Пападопулос бўлганидан хабарингиз борми? Жиззах вилоятидаги халқ тилида «Гагарин» деб юритилувчи шаҳарчада дунёга келган. 7 ёшга тўлгач, оиласи билан Грецияга кўчиб кетади.

Европа чемпионатида ҳар доим ҳам ғолиблар шу давлат вакили бўлавермайди. Улар орасида Африка, Осиё ва бошқа қитъаликлар ҳам мавжуд. Хўш, улар ким ва асл ватани қаер? Бугун шу саволларга жавоб беришга қодир ўзига хос рамзий терма жамоани эътиборингизга ҳавола этмоқчимиз.

Оливер Кан (Латвия) - 1996 йилги Европа чемпионати ғолиби

Таниқли посбонни танимаган футбол мухлиси бўлмаса керак. У аллақачон немис футболининг бир бўлагига айланганига қарамай, отаси асли латвиялик. Унинг бувиси Липея шаҳрида дунёга келган. Шундай экан, латвияликлар Оливер Кан билан бемалол фахрланиши мумкин.

Марсель Десайи (Гана) - 2000 йилги Европа чемпионати ғолиби

Франция терма жамоаси сафида ЖЧ ва қитъа биринчилигида ғолиб чиққан футболчи Аккра шаҳрида таваллуд топган. Болакайга Оденке Аббей исми берилади. Оденке 4 ёшга тўлганида, унинг онаси француз дипломатига турмушга чиқади ва Европага кўчиб ўтади. Ганалик Аббей кўп ўтмай Марсель Десайига айланади.

Пепе (Бразилия) - 2016 йилги Европа чемпионати ғолиби

3 маротаба ЕЧЛда зафар қучган йигит Португалия термасининг чинакам етакчиси, аммо у Жанубий Америкада туғилган. Тўлиқ исми Кеплер Лаврен Лима бўлган ўспирин Европага кичик Масейра шаҳридан кўчиб келади. Португалия терма жамоаси сафида бундай маршрутни босиб ўтганлар етарлича, бироқ Пепе улар орасидаги энг омадли танлов. У 38 ёшда ҳам терма жамоанинг асосий суянчиғи саналади.

Данилу Перейра (Гвинея - Бисао) - 2016 йилги Европа чемпионати ғолиби

ПСЖ футболчиси Ғарбий Африкада туғилган бўлсада, футбол оламига ортиқча муаммосиз кириб келди. Данило 5 ёшга тўлганида, оиласи Португалияга кўчиб келди. Қаҳрамонимиз 7 ёшида «Бенфика» клуби академиясига қабул қилинди. Кейин нималар бўлганидан хабарингиз бор.

Патрик Виейра (Сенегал/ Кабо-Верде) - 2000 йилги Европа чемпионати ғолиби

«Арсенал» ва француз футболи афсонаси 8 ёшга қадар Африка қитъасида истиқомат қилган. Сенегалда туғилган бўлсада, у Кабо-Верделиклар билан катта бўлди. Патрик «учранглилар» сафида қўлга киритиш мумкин бўлган барча совринларга эга чиқди. Кучли бешликдаги деярли барча чемпионатларда тўп сурди. Ҳозир дунёнинг энг бадавлат спортчиларидан бири саналади.

Маркос Сенна (Бразилия) - 2008 йилги Европа чемпионати ғолиби

Луис Ароганеснинг «топилмаси» босиб ўтган йўл сизни ҳайрон қолдириши аниқ. Қаҳрамонимиз 26 ёшга қадар Бразилияда тўп сурган. 2002 йилда «Сан-Каэтано» клуби таянч ярим ҳимоячисини «Вильярреал» Испанияга олиб келди. Унинг трансфери учун «сариқ сувости кемаси» 600 минг евродан воз кечди. Луис Араганес 2006-2008 йиллар оралиғида терма жамоа бошқарувини ўз ҳолига олгач, Сенна тез-тез терма жамоадан таклиф олишни бошлади. Маркос «қизил фурия»нинг ижодкор ярим ҳимоячилари эркин тўп суриши учун таянч зонасида «жанг» олиб борди. Якунда, ўз фаолиятидаги энг нуфузли совринга эга чиқди.

Уильям Карвалью (Ангола) - 2016 йилги Европа чемпиони

Африкада туғилган яна бир амалдаги Европа чемпиони билан танишинг. Португалия давлатининг собиқ мустамлакаси бўлган Анголадан келган йигит қисқа муддатда барча орзусига етишди. Оиласини қашшоқликдан қутқарди, футбол билан шуғулланишда давом этди.

Юрий Жоркаефф - (Арманистон) - 2000 йилги Европа чемпиони

Юрий Франция терма жамоаси билан Патрик Виейра сингари барча совринларни ютиб олган. Унинг отаси ҳам футболчи бўлиб, «учранглилар» сафида 48 ўйин ўтказган. Солиштирадиган бўлсак, Юрийнинг натижаси анча яхшироқ: 82 ўйинда 28 гол.

Ўзининг шедевр голлари билан тарихда қолган футболчининг отаси польяк. Онаси эса, арманистонлик. Биринчи жаҳон уриши чоғида, Францияга кўчиб ўтади. Шу ерда, турмуш ўртоғи билан танишади. Шунга қарамай, Юрий ўзини арман миллатига мансуб эканлигини яшириб ўтирмайди.

«Менинг юрагимда арман халқи алоҳида ўрин эгаллайди. Танамда тоғликлар қони оқаётганидан фахрланаман. Бувам Гаро Оганянни яхши эслайман. Шу боис, ўғлимга Оган деб исм қўйганман. Катта ўғлимнинг исми Арам. У ҳам мен сингари ўзини арман халқи вакили деб ҳисоблайди.»

Зайниддин Зидан (Жазоир) - 2000 йилги Европа чемпиони

Барча замонлардаги энг кучли техника эгаси саналган футболчи Францияда ёруғ дунёни кўрган, аммо асли қаерлик эканлигини унутгани йўқ. Бир неча ўн йиллардан бери, у ота-онаси билан биргаликда Жазоирга ташриф буюради, хайрия компаниялари ўтказади, Жазоирнинг мундиалдаги ўйинларини томоша қилиш мақсадида стадионга ташриф буюради. Энди эса, Европа биринчилигида Карим Бенземага мухлислик қилиши аниқ.

Нани (Кабо-Верде) - 2016 йилги Европа чемпиони

«Манчестер Юнайтед»да Роналду сингари порлаган, терма жамоада у билан биргаликда «кўҳна қитъа»да тенгсизга айланган Нани ҳам асли Африкадан. Унинг болалиги Кабо-Верденинг пойтахти Преада ўтган. Лиссабонга кўчиб ўтгач, болакай катта қийинчиликларни енгиб ўтди. Каламушлар билан тўла уйда истиқомат қилган бўлсада, орзуси сари интилишдан бир сония ҳам тўхтагани йўқ.

Фредди Бобич (Словения/Хорватия)

1995/96 йилги мавсумда Фредди «Штугарт» сафида Бундеслиганинг энг яхши тўпурарига айланди. Шу боис, уни «бундесманшафт» «Евро-1996»га олиб кетди. Тўғри, қаҳрамонимиз мусобақада айтарли из қолдиргани йўқ. 3 ўйинда захирадан тушди. Шунга қарамай, ундан олтин медални ҳеч ким олиб қўйгани йўқ. Фамилиясининг ўзи болқонлик эканлигини айтиб турган йигит Словениянинг Марибор шаҳрида улғайган. Отаси Словениялик бўлса, онаси Хорватиядан эди.