Европа футболида ноёб воқеа рўй берди

Англиялик ҳужумкор футболчи Жейдон Санчо Еврокубокларда аввал ҳеч кимга насиб этмаган ноёб натижани қайд этди.

“Астон Вилла” 2025-2026 йилги УЕФА Европа лигаси финалида “Фрайбург”ни 3:0 ҳисобида мағлуб этди. Англияликлар етакчиси Жейдон Санчо учун бу кетма-кет уч мавсумдаги учинчи еврокубок финали бўлди.

Scotland’s Coefficient нашрининг X ижтимоий тармоғидаги саҳифаси хабар беришича, Санчо кетма-кет уч мавсумда уч хил еврокубок финалига чиққан дунёдаги ягона футболчига айланди.

Шу билан бирга, Жейдон бу натижани уч хил клуб билан қайд этди. 2024-2025 йилги мавсумда у “Челси” сафида УЕФА Конференциялар лигаси финалида “Бетис”ни 4:1 ҳисобида мағлуб этиб, ғолиб бўлган эди.

2023-2024 йилги мавсумда эса англиялик футболчи Дортмунднинг “Боруссия”си билан УЕФА Чемпионлар лигаси финалида “Реал”га  қарши ўйнаган, лекин ҳал қилувчи баҳсда 0:2 ҳисобида мағлубиятга учраган.

Санчо ушбу учала финалда ҳам ижара асосида жамоалари сафида ўйнаган, футболчига бўлган ҳуқуқлар эса “Манчестер Юнайтед”га тегишли.

Transfermarkt интернет-портали маълумотига кўра, футболчининг тахминий нархи 20 миллион еврони ташкил қилади. Жорий мавсумда Санчо барча турнирларда 39 та ўйинда қатнашиб, битта гол урди ва учта голли узатмани амалга оширди.