Европадаги легионеримизнинг голи жамоасини биринчи ўринга олиб чиқди

Ўзбек футболининг энг иқтидорли тарбияланувчиларидан ҳисобланган Умарали Раҳмоналиев бу йилги мавсумни Озарбайжон чемпионатида ўтказмоқда.

22 ёшли ярим ҳимоячи ижара асосида Боку шаҳрининг “Сабаҳ” жамоаси шарафини ҳимоя қиляпти. Бокуликлар чемпионатнинг 15-турини сафар ўтказиб, “Турон” жамоаси билан куч синашди.

Учрашув меҳмон жамоа устунлигида ўтди. “Сабаҳ” вакилларидан Жой Миккельс биринчи бўлимда ҳисобни очди. Ўйиннинг иккинчи ярмида Велько Шимич иккинчи тўпни киритди. Баҳсни тўлиқ ўтказган Умарали Раҳмоналиев 78-дақиқада тўп киритиб, ҳисобни мустаҳкамлади. Мезбонлар битта жавоб тўпини киритди.

Бу ғалабадан кейин “Сабаҳ” тўққизта ғалаба ва тўртта дуранг билан 31 очко тўплаган ҳолда Премьер-лига жадвалида биринчи ўринга кўтарилди. Бироқ кейинги поғонада бораётган “Карабах” бир ўйин кам ўтказган ҳолда 30 очко жамғарган.

Умарали Раҳмоналиев киритган тўп ҳамюртимизнинг Озарбайжон чемпионатидаги дебют голи сифатида қайд этилган.Ҳозиргача 14 та ўйинда қатнашган легионеримиз ҳисобида битта голли пас ҳам бор.

Раҳмоналиев аслида “Бунёдкор” академиясидан етишиб чиққан истеъдодли ўйинчилардан. Универсал ярим ҳимоячи мамлакатимиз Суперлигасида “Бунёдкор” шарафини бир йил ҳимоя қилганидан кейин 2023 йилнинг бошида Россия Премьер-лигаси вакили “Рубин” жамоасига эркин агент мақомида бориб қўшилди.

Қозон шаҳри клуби Раҳмоналиев ўйин амалиётига эга бўлиши ва тажриба тўплашини таъминлаш мақсадида уни 2025 йилнинг бошида “Сабаҳ” жамоасига ижарага жўнатди.

Легионеримизнинг ҳозирги клуби билан ижара шартномаси шу йилнинг 31 декабрь куни якунланади. Кейин Умаралининг келажагини “Рубин” клуби раҳбарияти ҳал қилиши лозим. Футболчимизнинг қозонликлар билан меҳнат шартномаси 2026 йилнинг 30 июнигача тузилган.

Одил Аҳмедов билан чемпион бўлган юлдуз кутилмаганда футболдан кетадиган бўлди

Ўзбекистонда Роналдуни тўхтатадиган бир футболчи бор

Хориж клубларига Ўзбекистондан футболчи олишни тавсия қилишди

Ўзбекистон улкан ҳурматга лойиқ! Португалия устози Мартинес яна нималар деди?

Бу хатодан кейин Гвардиола Ҳусановни асосий таркибга қайтариши шарт