ФАКТ!

Суперлига 6-турида "Пахтакор" Навоийда "Қизилқум" меҳмони бўлади. "Пахтакор" клуби матбуот хизмати ўйинга оид маълумотларни тақдим этди.

Мазкур учрашувда жамоалар таркибида дисквалификация туфайли йўқотишлар мавжуд эмас.

Чемпионатлар тарихида жамоалар 40 учрашувда майдонга тушишган. Ўзаро ўйинлар бўйича устунлик яққол "Шерлар" тарафида. 33 баҳсда зафар қучган "Пахтакор" 6 бор рақиб билан дуранг ўйнаган ва бир марта имкониятни бой берган. "Қизилқум" дарвозасига 112 гол урилиб, 23 тўп ўтказиб юборилган.

Олий лига тарихида қайд этилган энг йирик натижа - 11:0 ҳисоби жамоаларнинг Навоийда 2007 йил ўтган беллашувида кузатилган. Ўшанда "Пахтакор" ушбу рақибни ўта йирик ҳисобда доғда қолдирган. Ўтган мавсумдаги беллашувларда "шерлар" Тошкентда 8:0, Навоийда 5:0 ҳисобида зафар қучганди. Навоийдаги 20 учрашувнинг бирортасида тошкентликлар мағлубиятга учрамаган. Меҳмонда 16 ғалаба ва 4 дуранг натижа кузатилган. Сафардаги 8 учрашувда "Пахтакор" йирик ҳисобда зафар қучган.

"Қизилқум" ва "Пахтакор" ўртасидаги учрашув 25 июнь, пайшанба куни соат 20:15да "Ёшлар" спорт мажмуаси стадионида бошланади.

Матнда хатолик топсангиз, ўша хатони белгилаб, бизга жўнатинг (Ctrl + Enter)