"Фаолиятим давомида бу каби мураббийни кўрмагандим" ёхуд Обид Жўрабоев кимга ишониб қолганди?

Бу йил “Бухоро” жамоаси ўз сафига бир қатор тажрибали футболчиларни қўшиб олди. Улардан бири ҳимоячи Обид Жўрабоев бўлиб, ўтган мавсумда “Динамо” шарафини ҳимоя қилди ва клубни Суперлигага қайтариш йўлида анча ҳиссасини қўшди.

Энди бўлса, “Бухоро”ни Суперлигага олиб чиқиш учун тер тўкяпти. Куни кеча жамоа етакчиси Sports.uz учун қатор мавзулар бўйича ўз фикрларини билдирди.

“Бухоро” таркиби бу йил 70-80 фоизга янгиланди”

- Про лигада 5 та тур ортда қолди. Бошида “Машъал” билан ўйнадик. Улар ҳам Суперлига жамоаси эди, кейин про лигага тушиб кетди. “Бухоро” таркиби бу йил 70-80 фоизга таркиби янгиланган. Ўтган йили бирга ишлаган мураббийимиз –Ҳаким Фузайлов бу йил “Бухоро”ни қабул қилди, таркибни ва позицияларни кучайтиришга ҳаракат қилди. Аммо футболда янгиланган жамоанинг ўйинини топиб олиши, футболчиларнинг бир-бирини тушуниб олишлари учун вақт керак бўлади. Биз чемпионатни про лигани етакчиларига қарши ўтказдик. Худога шукр, мағлубиятга учрамадик. Ўйлайманки, ўтган йилгига қараганда, бу йил про лига анча кучли. Олдимизга қўйилган вазифа Суперлигага чиқиш. Ушбу мақсадимиз сари ҳаракат қилаверамиз. Иложи бўлса, биринчи даврани 1-2-ўринларда тугатишга интиламиз.

“Тўплаган очколаримиз ҳозирча кам бўлиши мумкин, аммо...”

- Биринчи ўйинимизда “Машъал”ни ҳам ютсак бўларди. Ўзимизни хатоларимиз эвазига голлар ўтказиб юбордик. Кейин Рўзим Аҳмедов ҳисобни тенглаштирганди. “Шўртан”га қарши учрашувда ҳам хатоларимиз кузатилди. Бизга ғалаба қозониш характери етишмагандек бўлди. Яратилган имкониятларимиздан ҳам фойдалана олмадик. Масалан, “Зомин” билан учрашувни оладиган бўлсак, ҳисобда олдинда бораётгандик. Кейин бўшашиб қолдик шекилли, “Зомин” гол урди ва ҳатто ютиб кетиши ҳам мумкин эди. Ҳали айтганимдек, жамоа янгиланган. Мураббийлар ўйинни кучайтириш устида ишлашяпти. Камчиликларимизни тушунтириб беряпти. Имкони қадар хатоларимизни такрорламасликка ҳаракат қиламиз. Тўғри, бешта турда тўплаган очколаримиз ўз олдига жиддий мақсад қўйган жамоа учун кам бўлиши мумкин. Лекин чемпионат яқиндагина бошланди. 1-ўриндаги жамоа билан орамиздаги очколар фарқи 4 тани ташкил қиляпти. Олдимизда ўйинлар кўп. Мисол учун “Турон”ни ўз уйимизда ютган бўлсак, уларнинг майдонига ҳам борамиз. Ҳали “Турон”, “Машъал”, “Андижон” каби клублар бир-бири билан ўйнаганлари йўқ. Про лига жуда қийин ўтяпти.

“Очиғи, уларнинг қарорини тушунмадик”

- Ҳа, ўтган йили бошида “Динамо”га келиб, Суперлига мақсади йўлида курашдик. Худо юзимизни ёруғ қилиб, жамоани элитага қайтардик. Ўшанда “Динамо” билан Суперлигада қоламан деб ўйлагандим. Клуб раҳбари Учқун Қобилов ҳам бирга Суперлигада ишни давом эттирамиз деганди. Лекин охирги учта турга келиб мураббийни ўрнига янгисини олиб келишни бошлашди. Айрим инсонларга ҳайрон қоламан-да, ёшми, қарими барибир майдонда югурасиз, ҳаракат қиласиз, тўғрими? Айримлари қари деган гапни топиб олишган. Лекин ёшларни ўзи ҳам 90 дақиқа давомида имконият яратиб бера олмаяптилар. Таркибни ёшартирдик дейишди. Лекин биз жамоани Суперлигага олиб чиқиш учун жон куйдириб ўйнагандик. Нимага деярли бутун таркибни кетказишди? Очиғи, уларнинг қарорини тушунмадик. Барибир жамоага 3-4 та етакчи ўйинчи керак-ку! Ёш жамоани тузиш учун аввало академияни кучайтириш лозим. Лекин бизга нисбатан нима учун бундай йўл тутишганини билмадим. Майли, яхшиликка бўлсин, омад тилайман. Лекин мураббийдан тортиб 20 та футболчига жавоб беришди. Бошқа жамоани шакллантиришяпти. Ҳаким Фузайлов “Бухоро”ни қабул қилганидан сўнг менга қўнғироқ қилиб, “Динамо”да қолмайдиган бўлсанг, биргалашиб “Бухоро”ни Суперлигага олиб чиқамиз деди. Қарасам, самарқандликлардан янги таклиф бўлмади. Клуб директори Учқун ака Қобилов ҳам қўнғироқ қилмади. Ҳеч ким индамагани учун “Бухоро”га келишга мажбур бўлдим. Аммо бошида 8-9 та ўйинчи Суперлигада ҳам қоласизлар, ёрдам берасизлар деб ваъдаларни беришганди. Амалда бундай бўлиб чиқмади. “Динамо” билан тузган шартномам ҳам бир йиллик эди. Аслида мени олиб қолиш нияти бор эди, кейин нимагадир ўзгариб қолдилар.

“Қаерга борса натижа кўрсатган”

- Ҳозирги пайтда мана шундай ажойиб мураббий билан ишлаётганимдан хурсандман. Ҳаким Фузайловни одамгарчилиги ҳам зўр. Инсонда ҳар хил ҳолат бўлиши мумкин ва у буни тушунади. Тўғри, керакли пайтда қаттиққўл. Жисмоний юкламалари, ўйин тактикалари менга жуда маъқул келди. Ўтган йили Самарқандга келганида танишгандик ва ўшанда ёшимни сўраб, менга майдонга чиқиб югуриб, ишингни қилсанг бўлди, ёшингни қизиғи йўқ, менга қолса 40 ёшда бўлмайсанми, деганди. Унга нисбатан ҳурматим ошди. Бундай эътибор ва гапидан кейин мураббийга нисбатан меҳрим ортди. Фаолиятимни охирларида мана шундай яхши савиядаги мураббий билан ишлаётганимдан хурсандман. Ҳатто, бу каби мутахассисни фаолиятим давомида кўрмаганман. Қаерга борса натижа кўрсатган. Мураббийдан анча нарсани ўрганяпман.