Фаолиятини қайта тиклаган "Истиқлол"нинг биринчи машғулотига 9 нафар футболчи келди. Анвар Бердиев қандай муаммолар билан тўқнаш келгани ҳақида ошкор қилди

Про-лига вакили “Истиқлол” жамоасида кутилмаган ўзгаришлар амалга ошиши давом этмоқда. Биласиз, аввалига клуб расман мусобақадан чиқиб кетгани эълон қилинганди. Энди бўлса, вазият ўзгарди ва “Истиқлол” мусобақадаги иштирокини давом эттирадиган бўлди.

Гарчи клуб фаолиятини қайта тиклаётган бўлса-да, энди вазият янада оғир бўлиши аниқ. Чунки жамоа етакчилари бошқа клубларга ўтиб кетишди. Бош мураббий Сергей Лебедев эса “Нефтчи”да иш бошлади. Бундан буён “Истиқлол”ни собиқ ҳужумчи Анвар Бердиев бошқаради. Мураббийликни яқинда бошлаган Бердиев клубдаги асл вазият ҳақида sports.uz мухбирига интервью берди ва қандай муаммолар билан курашишганини айтди.

- Охирги пайтларда “Истиқлол” жамоаси кун тартибида бўлиб турибди. Аввалига про-лига мусобақасидан чиқиб кетди, энди бўлса, яна қайтгани маълум бўлди. Жамоанинг ичидаги инсон сифатида айтинг-чи, аслида нималар бўляпти? Воқеалар ривожи қандай кечяпти?

- Билсангиз, “Истиқлол” жамоасига ўтган йили футболчи сифатида келгандим. Ўшанда ҳам бизда стадион муаммоси бор эди. Лекин “Нефтчи”га раҳмат, улар бизга уй уйинларимизни Қиргулидаги стадионда ўтказишга рухсат беришган. Бу ўтган йилги муаммо эди. Афсуски, бу йил ҳам яна ўша муаммо кузатилди. Фақатгина самарқандликларга қарши Кубок учрашувини “Истиқлол” стадионида ўтказиб олдик холос. Машғулотларимизни у ерда ўтказа олмадик. Бошқа жойда эса барибир ўзимизни ўз майдонимиздагидек ҳис қила олмасдик. Нима учун “Истиқлол” стадионидан фойдалана олмаганимизнинг сабабини аниқ билмайман. Лекин мана шу стадион муаммоси сабабли бошлиқларимиз ҳам чарчаб кетишди. Ҳар ўйиндан олдин нима қиламиз, қаерда ўйнаймиз, деган муаммо чиқаверарди. Ҳаттоки, машғулот ўтказадиган майдондан ҳам қийналиб кетгандик. Ишонасизми, расмий ўйинимиз яқинлашавергани сари қўрқадиган бўлиб қолдик. Қаерда ўйнар эканмиз, деган савол кўндаланг турарди. Футболчиларимизни шуғуллантириш ўрнига кўпроқ стадион муаммоси билан юрадиган бўлиб қолгандик. Яна ҳам бу йил “Нефтчи” раҳбарларининг ёрдами билан “Зомин” ва “Оқтепа”га қарши ўйинларимизни Қиргулида ўтказиб олдик. Барибир ўз майдонимиз бўлмагани бу футболчиларга ҳам ўз таъсирини кўрсатмасдан қолмади. Буларни баҳона қилиб кўрсатмоқчи эмасман. Йигитларимиз ёмон ўйнашмаётганди. Учрашувлар давомида вазиятларни голга айлантириш бўйича омадимиз юришмади. Балки натижалар ҳам кайфиятга таъсир қилгандир. “Оқтепа” билан ўйиндан кейин бошлиқлар ечиниш хонасига кириб, клуб фаолиятини тўхтатганини айтиб чиқиб кетди. Шундан сўнг кутилмаганда яна ўзгаришлар бўлиб кетди. Яқинда наманганлик мухлисларга ҳавасим келишини, уларда футболга қизиқадиган вилоят ҳокими борлиги ҳақида айтгандим. Буни қарангки, Хайрулла Ҳайитбоевич Бозоров Фарғона вилояти ҳокими этиб тайинланди. Шундан сўнг клубимиз раҳбари қўнғироқ қилиб, жамоа фаолиятини қайта бошлашини айтганида хурсанд бўлдик. Лекин бир қатор етакчиларимизни сақлаб қолишда кеч қолдик. Улар бошқа жамоалар билан шартномалар тузиб бўлишганди. Энди ички имкониятимиздан келиб чиқиб, ҳаракат қиламиз ва курашишни давом эттирамиз. Ўз ўрнида ПФЛ раҳбарларига бизга яна имконият беришгани учун раҳмат айтаман. Шунингдек, вилоят ҳокими ва ҳомийларимизга ҳам миннатдорчилик билдираман.

анвар бердиев5

- Демак, “Истиқлол”нинг қайтишига вилоят ҳокими сабабчи бўлдими?

- Клубимиз раҳбари ўз стадионимиздан фойдаланишга вилоят ҳокими рухсат берганини айтганида, билдимки, у киши ёрдам берган. Вилоят ҳокими дарҳол стадион масаласини ҳал қилиб берди.

- Тўғри, жамоани кўплаб етакчилари тарк этишди. Айни пайтда клубда неча нафар футболчи қолди?

- Бугун машғулот ўтказганимизда 9 та футболчи келди. Улардан икки нафари дарвозабон Ҳамма ўйинчиларни йиғадиган бўлсак, 15 та атрофида бўлиб қолади. Ўзимизнинг ёшлар жамоамизга ҳам эътибор қаратамиз ва айрим йигитларни таркибга қўшиб оламиз. Яна бошқа футболчилар билан гаплашяпмиз ва уларни ҳам рўйхатдан ўтказиб, шартнома тузишга ҳаракат қиляпмиз. Вақтимиз оз қолган. Ҳаммасига улгуришимиз керак. Қийинчилик эса ҳамма жойда бўлади. Бизга имконият яратиб беришгани учун бундан фойдаланишга ҳаракат қиламиз.

- Бундан чиқди, ПФЛ “Истиқлол”га янги ўйинчиларни рўйхатдан ўтказишга рухсат берибди-да?

- Шунақа. Фақат биринчи лигадаги жамоалардан ўйинчи олишимиз мумкин.

- “Истиқлол”да етакчилардан кимлар қолди, ўзи?

- Ҳимоя чизиғимиздан кўнглим тўқ десам бўлади. Иккита яхши дарвозабонимиз ҳам ўзимизда қолди. Ҳимоячиларимиздан Абдуҳолиқ Қурбонов, Улуғбек Худойбердиев, Жасур Эрмаматов, ярим ҳимояда Сардор Сотволдиев, Элёр Мамасолиев бор. Ҳужум чизиғимизда биргина Санжар Баратов қолганди. Уни ёнига янги ҳужумчи олмоқчимиз. Билсак, Даврон Исоқов уйда экан. Ҳозир у билан гаплашяпмиз.

- Клубнинг мураббий ва футболчилардан қарздорлиги каттами?

- Бу масалада бугун раҳбар билан гаплашдим. Унга футболчилар қайтишаётганини айтдим. Тез орада жамоа билан учрашади ҳамда вазиятдан чиқиб кетиш учун ҳаракат қилишини айтди. “Истиқлол”да ҳар доим ойлик маошлари ва мукофот пулларини вақтида олишган. Бундай муаммо бўлмаган.

- Бош мураббий Сергей Лебедев “Нефтчи”га қайтди. Сизни ҳам “Истиқлол”дан кетишингизни кутгандик. Ростдан ҳам кетмоқчи эдингизми ёки жиддий таклиф бўлмагани учун қолиб кетдингизми?

- Яширмайман, “Нефтчи”дан таклиф бўлди, раҳбарият билан учрашиб гаплашдим. Таклиф учун раҳмат айтдим.

- Нима учун “Нефтчи”да ишлашни истамадингиз?

- Аниқ сабабларини айта олмайман. Асосийси, клуб бошлиғи Зоҳид Ғофуров билан бош мураббий Асад Дўрмонов менга ишонч билдиришаётганди. Қолган гапларни ошкор қилмоқчи эмасман. Ҳаммасини вақти соати келганда билиб оласиз. Бу ёқда эса “Истиқлол” фаолиятини давом эттирадиган бўлди. Гарчи жамоамиздан етакчилар кетишган бўлса ҳам қолган ўйинчилар уйда ўтиришганди ва улар ҳам қўнғироқ қилиб, чемпионат охиригача ўйнаб қўйишлари кераклигини айтишаётганди. Тўғриси, “Нефтчи”нинг мураббийлар штабида бир қатор мутахассислар ишлашяпти. Улар вазифасини яхши бажаришяпти. Футбол мактабларидан ҳам таклифлар бўлди. Аммо яна “Истиқлол”да ишлаш насиб қилган экан.

- Мураббийликни энди-энди бошлаяпсиз. Аммо олдингизда қийин йўл турибди. Ҳамма ҳам бундай оғир вазиятдаги, футболчи етишмаётган жамоани бошқаришга журъат қилавермайди. Ҳамма қийинчиликларга тайёрмисиз?

- Қийинчилик бўлмаган жойда ўсиш бўлмайди. Шу нарсага тайёр бўлмаганимда бундай масъулиятни зиммамга олмасдим. Раҳбарлар бош мураббийликни менга ишониб топширишди. Жамоамиздаги футболчилар билан нимадир қиламиз деб ваъда бера олмайман. Лекин шуни аниқ айтаманки, ҳар бир жамоага максимал даражада қаршилик кўрсатишга, чақилмас ёнғоқ бўлишга ҳаракат қиламиз.

анвар бердиев4

- Дарвоқе, Аббос Махсталиев ҳам кўринмай қолди, у қаерда?

- Махсталиев “Янгиер” жамоасида. 6-7 нафар ўйинчимиз кетди. Айрим ёшларимиз “Локомотив”га кетишганди, уларни ҳам қайтаришга ҳаракат қиляпмиз. Захирада қолиб кетаётган футболчилар кўпинча хафа бўлишарди. Мана, энди уларга ҳам ўзларини кўрсатишга имконият бўляпти.

- Сизни қандай ҳужумчи бўлганингизни ҳамма яхши билади. Ҳозирги пайтда чемпионатимиздаги ҳужумчилар ҳақида нима дея оласиз?

- Яхши ҳужумчилар бор, йўқ эмас. Олдин мураббийлар ҳужумчининг индивидуал маҳоратига кўпроқ эътибор қаратишарди. Ҳозир жамоавий ўйинга урғу бериляпти. Масалан, “Насаф”даги Бобур Абдуҳолиқовни олайлик, кўпчилик уни вазиятлардан фойдалана олмаслик учун танқид қилишади. Бироқ имкониятни яратишнинг ўзи ҳам ҳужумчига хос нарса. Тўғри, кўплаб ҳужумчиларимиз вазиятларни голга айлантира олмаяптилар. Мана кўрасиз, тўпурарликка ҳадеб легионерлар эмас, ўзимизнинг ҳужумчиларимиз ҳам даъвогарлик қиладилар. Илгари Зафар Холмуродов, Жаъфар Ирисметов, Анвар Солиев, Умид Исоқов, Бахтиёр Ҳамидуллаевга ўхшаган ҳужумчилар тўпурарлик учун курашишарди. Ҳозир ўзини кўрсатаётганлардан Бобур Абдуҳолиқов, Игорь Сергеев ва Темурхўжа Абдуҳолиқовни айтиш мумкин. Вақт соати келиб Ўзбекистондан янада яхши ҳужумчилар етишиб чиқади.

 

Фикрлар

Фикр қолдириш учун авторизациядан ўтинг!
Расулжон Тоштемиров
30/09/2020 17:37
Омад ёр булсин