"Бунёдкор" - "Локомотив" ўйинидан кейин нима бўлганди?

Чемпионатимизнинг ўтган турида Тошкент дерби доирасида "Бунёдкор" ҳамда "Локомотив" клублари ўзаро беллашишганидан хабарингиз бор ва унда майдон эгалари 2:0 ҳисобида ғалаба қозонганди. Бироқ учрашувдан кейин ҳар иккала жамоа аъзолари ўртасида ўзаро кичик жанжал юзага келгани маълум бўлди. Бу хусусида ЎзПФЛ матбуот хизмати қуйидагича баён қилди:

"Суперлига 5-туридан ўрин олган Бунёдкор — Локомотив учрашуви якунлангач, микст-зона яқинида икки клуб футболчилари иштирокида жанжал келиб чиқди. Унда клублардан икки нафар вакил енгил тан жароҳати олган.

Миллий гвардия вазиятга яқин эканлигидан келиб чиқиб, можаро тезда бартараф этилган. Ички ишлар органлари таянч пунктида ўтказилган суриштирувда томонлар бир-бирига нисбатан даъвоси йўқлигини маълум қилган.

Мазкур ҳолат комиссар томонидан баёнлаштирилган. Шундан келиб чиқиб, Лига вазиятни тўлиқ ўрганиш мақсадида Ассоциация қошидаги Футбол фаолиятини назорат қилиш бўйича махсус инспекцияга расмий мурожаат қилди. Айни вақтда инспекция можаро иштирокчилари билан суҳбат ўтказиб, Бунёдкор стадионида рўй берган ҳолатни стадион камералари тасвирлари, Комиссар билдиргиси ва албатта учрашув давомида рўй берган кичик тўқнашув ва эпизодлар ёрдамида ўрганмоқда. Ўрганиш ишлари якунлангач, инспекция ҳолатнинг келиб чиқиш сабаблари ва унинг оқибатлари тўлиқ баёнлаштирилган материални Лигага тақдим этади.

Ўз навбатида Лига тайёр материални Тартиб-интизом қўмитасига оширади ва можаронинг ҳар қандай иштирокчиси спортчиларга хос бўлмаган ҳаракатлари учун тегишли тартибда жазоланишини таъминлайди", - дейилади расмий хабарда.