Farg‘ona viloyati hokimi: "Neftchi"ga Osiyo Chempionlar ligasida o‘ynash yarashadi"

“Neftchi”ning o‘z maydonida Samarqandning “Dinamo” jamoasini 2:1 hisobida mag‘lubiyatga uchratgani va shu tariqa pro liga g‘olibiga aylangani katta shodiyonaga aylanib ketdi.

Farg‘ona viloyati hokimi Xayrulla Bozorov ham uchrashuvni bevosita stadionda kuzatdi va o‘yindan keyingi taqdirlash marosimida ham qatnashdi. Viloyat rahbari so‘zga chiqib muxlislarga shunday dedi:

“Mavsum avvalidagi taqdimotda sizlar bilan yaxshi niyat qilgandik. “Neftchi”ga Superligada ishtirok etish yarashadi, “Neftchi”ga Osiyo Chempionlar ligasida o‘ynash yarashadi! Bugun birinchi niyatimiz amalga oshdi.

Xudo xohlasa, kelgusi yildan sevimli jamoamiz Superligada qatnashadi. Bugun hammamiz yaxshi niyat qilaylik, jamoamiz Superligada munosib qatnashib, muxlislarimizni xursand qilsin. Keyingi yillarda Osiyo Chempionlar ligasida qatnashish nasib qilsin.

Barcha farg‘onalik muxlislarni, yurtimizdagi “Neftchi” ishqibozlarini bugungi g‘alaba bilan yana bir bor muborakbod etaman. Jamoamizning faoliyatiga omad tilaymiz.

Shu fursatdan foydalangan holda “Dinamo” jamoasiga chiroyli o‘yin ko‘rsatgani uchun rahmat aytamiz va ularni ham Superliga yo‘llanmasini qo‘lga kiritgani bilan tabriklaymiz”.