Фарғоналик мухлислар ғалабали онларни соғинди ёхуд дербида иккала жамоа ҳам уч очкога ташна...

Чемпионатимиздаги танаффусдан фойдаланиб, қолдирилган ўйинлар ўтказиб олинади. Уларнинг орасида водий дербиси ҳам бор. Жумладан, Яйпанда Фарғона вилоятининг икки жамоаси – “Турон” ҳамда “Нефтчи” ғолиблик учун майдонга чиқишади. Бир вилоятнинг икки жамоаси майдонда саф тортар экан, иккала жамоа ишқибозлари иккига бўлинадилар.

19-турдан ўрин олган “Турон” – “Нефтчи” учрашуви 9 ноябрга қолдирилган бўлиб, айни пайтда Фарғонанинг икки жамоаси бўлажак дербига жиддий тайёрланмоқдалар. Чемпионат тугашига иккита тур қолганида бу жамоаларнинг қолдирилган ўйини улар учун қўшимча имконият демакдир. Турнир жадвалидаги вазиятни биласиз. “Турон” Суперлигада қолиш учун бор имконияти билан курашяпти. “Нефтчи” бўлса охирги учрашувдаги муваффақиятсизликлардан кейин мухлисларини ранжитиб қўймоқда. Натижада медаллар учун курашда имконияти кескин пасайиб кетди.

“Нефтчи” охирги марта 27 сентябрь куни ўз уйида “Бухоро”ни 3:0 ҳисобида мағлубиятга учратганди. Шундан бери Виталий Левченко жамоаси ғалаба қозона олмаяпти. 3 та мағлубият ва 1 дуранг ўйнади. Чемпионатда мағлубият нималигини билмай келаётганлиги ҳақида кўп гапирилган “Нефтчи”да энди бунинг аксини кўряпмиз. Демак, Левченко жамоаси бу учрашувга ҳар қачонгидан кўра ғалабага ташна бўлиб келади.

Ўтган турда “Истиқлол” стадионида “Олимпик” “Нефтчи”ни биргина гол эвазига ютиб кетди. Гол урилишидан аввал “Нефтчи” сардори Лутфулла Тўраев пенальтидан фойдалана олмади. Бу эса мезбонлар учун қимматга тушди. Шундоқ ҳам жамоа кетма-кет муваффақиятсиз учрашувлардан кейин руҳий тушкунликка тушиб қолган ва бундан чиқиб кетиши қийин кечяпти. “Турон” билан беллашувда ҳам футболчиларнинг руҳий тайёргарлигига кўп нарса боғлиқ. “Нефтчи” бу сафар ҳам ғалабасиз сериясини давом эттиради ёки омадсизликка чек қўяди. Бу ёғи жамоани қанчалик тайёргарлигига боғлиқ.

“Турон”га келсак, ёшлар билан босимсиз ўйнаётган жамоа ютқазаётган учрашувларида ҳам унчалик салбий таассурот қолдираётгани йўқ. Гарчи ўтган турда ОКМКга ютқазган бўлса-да, жамоа мағлубиятга лойиқ ўйнамади. Ҳаммасига ўзлари сабабчи бўлди. Чунки қатор яратилган голли имкониятлардан фойдалана олмаслиги оқибатида “Турон” аламли тарзда ютқазди. “Нефтчи”га қарши Ёрқин Назаров жамоаси тажовузкор ўйин кўрсатишини тахмин қилса бўлади.

Ёдингизда бўлса, биринчи даврада “Истиқлол” стадионидаги учрашувда жамоалар 1:1 ҳисобида дурангга рози бўлишган. Суперлигада навбатдаги баҳс ушбу клубларнинг ўзаро иккинчи тўқнашувига айланади. Про лигада иккала клуб 4 марта учрашишган. 2 та дуранг қайд этилган. Шунингдек, жамоалар биттадан ғалаба қозонган.

Дарвоқе, дерби олдидан “Нефтчи”да йўқотиш бор. Грузиялик футболчиси Никабадзеда сариқ карточкалар 4 тага етгани боис “Турон” билан ўйинда жамоасига ёрдам бера олмайди. “Нефтчи” устози Виталий Левченко балки бошқача таркиб ва бошқача тактик услубини амалда синаб кўрса ажабланмаймиз. Зеро, “Нефтчи”ни ҳам яна очко йўқотишига ҳаққи йўқ. Ўзи шундоқ ҳам 4 та учрашувдан бери ютолмаётган жамоа совринли ўринлардан узоқлашиб кетяпти. Ҳеч бўлмаса дербидаги ғалаба орқали мухлисларига ғалаба кайфияти улашишга ҳаракат қилади. Фақат бунинг учун “Турон”нинг қаршилигини егиши лозим.

Иккала жамоадаги вазият икки хил ва яйпанликлар аслида ғалабага ниҳоятда мухтож. Дуранг ҳам уларни қониқтирмайди. Шунинг учун бош мураббий Ёрқин Назаров кучли рақибини енгиш йўлларини излаётгани аниқ. Майдонда қизиқарли тўқнашув гувоҳи бўламиз.

Шуҳратбек Жўраев.