Фарҳод Соҳибжонов: "Бу ғалабада мураббийимизнинг ҳиссаси катта"

“Андижон” Жиззахда “Сўғдиёна”га қарши бўлиб ўтган учрашувда ўз иродасини намойиш қилиб, мағлубиятни ғалабага айлантира олди. Бунинг учун барча футболчилар охиригача меҳнат қилишди ва уч очкони қўлга киритишларига тўлиқ ишондилар. Натижада “Бургутлар” Жиззахда ҳам парвозини амалга оширди.

Захирадан ўйинга қўшилган Фарҳод Соҳибжонов охирги дақиқаларда ғалаба келтирувчи гол муаллифига айланди. Футболчи “Андижон” матбуот хизматига қисқача интервью берди.

- Фарҳод, сафарда қўлга киритилган ажойиб ғалаба билан табриклайман. Учрашув борасида нималарни айта оласиз?

- Авваламбор, Андижон халқини ва “Андижон” мухлисларини ғалаба билан табриклайман. Ўзинглар кўрганинглардек, оғир ўйин бўлди. Иккинчи таймда қаттиқ ҳаракат қилдик. Шунинг эвазига ғалабани қўлга киритдик, Худога шукр. 1:0 ҳисобида ютқазаётгандик, кичик камбэкни амалга оширдик. Бу ғалабада мураббийимизнинг ҳиссаси катта. Ўйинчи алмаштиришларни тўғри қилди, деб ўйлайман.

- Захирадан майдонга тушиб гол урдингиз ва айнан ҳал қилувчи голни уришингизни аниқ кутганмидингиз?

- Ўйиндан олдин кутгандим. 1:0 ҳисобида мағлубиятга учраётганимиз боис иккинчи бўлимга ҳамма футболчиларни кўзи “ёниб” майдонга тушишди. Менда ҳам шунақа ҳолат бўлди.

- Афсуски, баҳс охирида қизил карточка туфайли майдондан четлатилдингиз. Буни қандай изоҳлайсиз?

- Ўша вазиятда ўз ҳиссиётларимни бошқара олмадим, деб ўйлайман.

- Биринчи даврада "Андижон" “Сўғдиёна”га худди шу ҳисобда ютқазганди...

- Ҳа, реванш олинди.

“Андижон” матбуот хизмати.