Файзуллаев Европага кетишига нималар тўсиқ бўлаётгани айтилди

Ўзбекистон миллий терма жамоаси ҳужумкор футболчиси Аббосбек Файзуллаев учун ЦСКАдаги жорий мавсум бироз мураккаб ўтмоқда. 2023 йили “Пахтакор”дан ЦСКАга ўтганидан кейин қисқа фурсатда “армиячилар” етакчисига айланган легионеримиз яқингача жамоа ҳужумларини ташкил этишда юқори кўрсаткичларни қайд этиб келаётган эди.

Бироқ 2025 йилдан бошлаб, Аббоснинг самарадорлиги сазиларли даражада тушиб кетди. Россия футболи таҳлилчилари Европага кетиш орзусидаги футболчимиз қандай вазиятга дуч келгани ва нималар қилиши кераклиги ҳақида ўз фикрларини билдиряпти.

Sports.uz портали россиялик экспертларнинг Аббосбек Файзуллаев ҳақидаги фикр-мулоҳазаларини ўзбекистонлик футбол ишқибозлари эътиборига ҳавола этади.

Алексек Петрушин, “Динамо Москва” клуби собиқ мураббийи:

Сал қўпол бўлса ҳам айтаман, Файзуллаев кейинги пайтда бироз бўшашди. Чунки у ромб шаклидаги янги ўйин услубига кўникишига тўғри келяпти. Машҳур “миланча ромб” схемаси бўйича буюк футбол усталари ўйнарди, Аббос эса, бу янгиликка мослашиб олиши керак. Шунга қарамай, Аббос жуда қизиқарли ўйинчи.

Бошқа томондан Файзуллаевнинг куч-қуввати ҳам чегарасиз эмас, терма жамоада жуда кўп ўйин ўтказяпти. Аббос  ёш, лекин у ҳам чарчайди.

Пасайиш фақат унда эмас, ЦСКАнинг бошқа ўйинчиларида ҳам кузатиляпти. Масалан, Иван Обляков “Спартак” билан ўйиннинг иккинчи бўлимида чарчаб қолганини ва зўрға нафас олаётганини кўрдик.

Евгений Алдонин, ЦСКА собиқ футболчиси:

Кўпчилик бош мураббий Марко Николич ўзи қўллаётган ромб усулида Аббосбек Файзуллаевга мос жой топиб беролмаяпти, деяпти. Аслида бу Николич ёки Файзуллаевнинг муаммоси эмас. Ромб – тез ўзгариши ва алмашиши мумкин бўлган ўйин схемаси. Учрашувлар давомида ЦСКА услуби кўп ўзгаряпти.

Файзуллаев ЦСКАга тўғри келмай қолди, дейиш нотўғри. Бу ўзгаришлар ўсиш ва ривожланиш учун туртки бўлади.

Аббос мақсад сари интиладиган ўйинчи. У нималарга қодирлигини кўрсатиб қўйган. Ҳар бир мураббийнинг ўз қарашлари бор. Футболчилар эса, ҳар доим учрашувларда қатнашишга тайёрлигини мунтазам намойиш этиши талаб қилинади. Сен агар жамоа етакчиси бўлсанг, ўзингни кўрсат ва мураббий ишончини қозон!

Александр Гришин, ЦСКА собиқ футболчиси:

Агар футболчи яхши ўйнаса, дарров Европадан қизиқиш бўлаётгани ҳақида гап-сўзлар чиқа бошлайди. Истаганча гапиришингиз мумкин. Хусусан, Аббосбек Файзуллаев бўйича аниқ таклифлар бор-йўқлигини ҳеч биримиз аниқ билмаймиз.

Бу масалани трансфер амалга ошганидан кейин ҳар қанча таҳлил қилсак арзийди. Унгача ҳаммаси қуруқ гап бўлиб қолаверади. Лекин масаланинг иккинчи томони бор. Матвей Сафонов ПСЖга ўтди. Унинг топ-лигага кетиши ҳақида ёзишганида ҳеч ким ишонмаган эди.

Файзуллаев мухлислар меҳрини қозонган энг ёрқин ўйинларини яна намойиш қилишни бошлаши керак. Аббосни қаерга трансфер қилиш ёки клубда олиб қолиш масаласи кейин муҳокама қилинади. Файзуллаевнинг айни пайтдаги ўйини уни Европага кетишга яқинлаштира олмайди.

Аббосбек Файзуллаев 2023 йилнинг августида ЦСКА сафига қўшилганидан бери Россия  Премьер-лигаси ва мамлакат кубоги мусобақаларида жами 65 та учрашув ўтказиб, ўз ҳисобига саккизта гол ва 21 та ассист ёздириб қўйган.

Шунингдек, 21 ёшли ҳужумкор футболчимиз Ўзбекистон миллий терма жамоаси сафида халқаро миқёсдаги 25 та беллашувда майдонга тушиб, рақиблар дарвозасини саккиз маротаба ишғол қилган.

Transfermarkt портали экспертлари томонидан трансфер суммаси саккиз миллион еврога баҳоланаётган Аббосбек Файзуллаевнинг ЦСКА билан тузган шартномаси 2026 йилнинг 30 июнига қадар давом этиши белгилаб қўйилган. 

“Манчестер Сити” афсонаси Ҳусановнинг кетишига қарши!

Файзуллаев ЦСКАдан кетиши ҳақида гапирди

Шомуродов урган голнинг қиймати баланд бўлиб чиқди!

Ўзбекистонлик “иблис”! Экспертлар Шомуродовга яна қандай таъриф беришяпти?

Шомуродовга фанатлар янги талаб қўйди!