Файзуллаев: "Мен учун бу медаль жуда муҳим"

Ўзбекистон терма жамоаси аъзоси Аббосбек Файзуллаев ЦСКА клуби сафида Россия Премьер-лигаси бронза медали соҳибига айланди. Легионеримиз Москва клуби билан эришган натижаси ҳақида ўз фикрларини билдирди.

"Мавсумнинг иккинчи ярмида биз яхши ўйин кўрсатдик. Мағлубиятсиз ўтган бу давр медалга муносиб бўлганимизни исботлайди.

Мен учун бу медаль жуда муҳим, айниқса ўтган мавсум биз учун омадсиз якунлангани инобатга олсак. Олдинда бизни яна бир муҳим ўйин кутмоқда, ҳозирги бор диққатимиз айнан ўша учрашувга қаратилган", – деди Файзуллаев.

1 июнь куни ЦСКА "Ростов"га қарши Россия Кубоги Суперфиналида майдонга тушади. Москва клуби Россия чемпионатини 59 очко тўплаб, 3-пағонада якунлади.