Файзуллаев нимадан норози?
Ўзбекистон миллий терма жамоаси учун тарихий жаҳон чемпионати муваффақиятсиз якунланди. Ҳар тўрт йилликнинг энг нуфузли мусобақасида иштирок этган футболчиларимиз Колумбия ва Конго Демократик Республикасига бир хил - 1:3, Португалияга 5:0 ҳисобида имкониятни бой берди.
Албатта, футболчиларимизнинг мундиалдаги иштирокида ижобий кўрсаткичлар ҳам бўлди. Умумий ҳисобда ҳамюртларимиз гуруҳдаги барча рақиблар дарвозасига йўл топа олишди. Аммо Азиз Ғаниевнинг Португалияга урган суперголи ва Элдор Шомуродовнинг Конго дарвозасига киритгагн тезкор тўпи қоидабузарликлар сабабли инобатга олинмади.
Қолган икки гол муаллифлари Аббосбек Файзуллаев ва Элдор Шомуродов ўз номини тарихга ёздириб қўйди.
22 ёшли Аббосбек Файзуллаев Ўзбекистон миллий терма жамоаси сафида энг ёрқин ўйин кўрсатган ва биринчи гол муаллифи сифатида эътибор қозонган бўлса-да, мундиалдаги иштирокидан қониққани йўқ.
Аббос ўз фикр-мулоҳазаларини журналистлар билан қисқа суҳбатда қуйидагича ифода этди.
— Натижадан қатъи назар, орзу амалга ошди, деб айта оласизми?
— Жаҳон чемпионатида ўйнадик — бу, албатта, катта воқеа. Лекин мен учун бунинг ўзи етарли эмас. Мен ғалаба қозонишни истайман. Биз бу сафар бунга эриша олмадик.
Ҳозир жуда чарчаганман. Умид қиламанки, кейинги жаҳон чемпионатига ҳам чиқамиз ва у ерда ғалабалар қўлга киритамиз.
— Ўзингиз ва жамоа имкониятларидан тўлиқ фойдаландингизми? Ёки янада яхшироқ ўйнаш мумкин эди?
— Йўқ, бу бизнинг чегарамиз эмас. Биз нималарга қодир эканимизни жуда яхши биламан. Яхши футбол кўрсата оламиз. Бу ерда эса, шунга етарлича эришолмадик.
Эслатиб ўтамиз, Ўзбекистон терма жамоаси гуруҳ босқичида учала ўйинда мағлубиятга учради ва мусобақани 2:11 тўплар нисбати билан якунлади.
Хьюстон шаҳрида "ЖЧ-2026" пайтида ўзбекистонлик мухлислар ҳам ўзларининг жамоани қўллаб-қувватлаш усули билан футбол жамоатчилиги эътиборини қозонди.
Фикрлар