Файзуллаевнинг ҳақиқий маҳоратини баҳорда кўрасизлар!

17 декабрь, 2023, 08:09
1
Футбол

Россия Премьер-лигасида келаси йилнинг 1 мартига қадар қишки танаффус эълон қилинди. Футбол жамоатчилиги, мураббийлар, экспертлари чемпионатнинг биринчи қисмини таҳлил қилмоқда.

Уларнинг аксарияти августда “Пахтакор”дан ЦСКАга кўчиб ўтган Аббосбек Файзуллаевнинг ўйинига эътибор қаратди.Легионеримиз ёш бўлишига қарамай, “армиячилар” сафида асосий фигуралардан бирига айланди.

MAN7370

ЦСКА ва Россия миллий терма жамоаси собиқ ўйинчиси Игорь Семшов журналистлар билан суҳбатда ўзбекистонлик ҳужумкор футболчининг Премьер-лиганинг биринчи қисмидаги иштирокига баҳо берди.

—Менга Аббосбекнинг ўйини жуда ёқади. У кўзга ташланадиган, тезкор, дриблинги зўр, тўп билан яхши ишлай оладиган футболчи.

— Файзуллаев чемпионатимизга жуда тез мослашиб кетди. Балки бунга ЦСКАнинг захира ўриндиғи қисқалиги сабаб бўлгандир.

Бош мураббий Владимир Федотов футболчига ишонч билдирмоқда ва Аббосбек бу имкониятдан унумли фойдаланиб келяпти. Чемпионатнинг баҳорги қисмида Файзуллаев ЦСКАнинг ҳақиқий етакчисига айланади.

— Файзуллаев ўз ҳамюрти Элдор Шомуродовнинг йўлини такрорлаб, Европага кетиши мумкинми?

— Биринчи ўринда, Файзуллаев жамоасининг бошланғич таркибидаги ўрнини мустаҳкамлаб, ЦСКАнинг етакчиси даражасига етишиши керак. Аббосбек Европага етук футболчи сифатида йўл олиши лозим.

Аббосбек Файзуллаев “Пахтакор” тарбияланувчиси ҳисобланади. Ҳамюртимиз бу йил Тошкент ва Аргентинада ўтказилган икки нуфузли мусобақа – 20 ёшгача бўлган футболчилар ўртасидаги Осиё ва жаҳон чемпионатларида юқори савияда ўйин намойиш қилганидан кейин хориж клублари скаутлари эътиборини қозонди.

Айнан шу турнирлардаги муваффақиятли иштироки эвазига Аббосбек Файзуллаев Халқаро футбол тарихи ва статистикаси талқини бўйича 2023 йилнинг энг яхши ёш футболчилари номинациясида ғолиблик учун курашадиган 26 нафар энг иқтидорли ўйинчилар қаторига киритилди.

Аббосбек Файзуллаев Россия Премьер-лигасига йўл олган ўзбекистонлик футболчилар орасида дебют мавсумини энг муваффақиятли ўтказаётган ўйинчи ҳисобланади. Ҳали ҳеч бир футболчимиз Россия футболида бу қадар тез кўзга кўринмаган эди.

ЦСКАнинг асосий ўйинчиларидан бирига айланган 20 ёшли ҳужумкор футболчимиз Москва клубига кўчиб ўтганидан кейин миллий чемпионат ва мамлакат кубоги баҳсларида 18 та учрашувда ўз ҳисобига иккита гол ва тўққизта ассист расмийлаштириб қўйди.

Аббоснинг “армиячилар” билан шартномаси 2026 йилнинг ёзигача тузилган. Томонлар ўзаро келишган ҳолда ҳамкорликни яна бир мавсум узайтириши мумкин.

volga (2)_1