Файзуллаевсиз қолган ЦСКА рекорд ўрнатди

Россия Премьер-лигасининг 28-турининг марказий учрашуви Москвада ЦСКА ва мусобақа жадвалида биринчи ўринда бораётган “Краснодар” ўртасида ўтказилди.

Беллашувда “армиячилар” Гуарирапанинг 69-дақиқада киритган ягона голи эвазига кичик ҳисобда ғолиб чиқди. Аббосбек Файзуллаев аввалги учрашувларда олган сариқ карточкалари сони тўрттага еткани боис, “Краснодар”га қарши баҳсни ўтказиб юборишига тўғри келди.

Opta Sports марказининг ўз ижтимоий тармоқларида маълум қилишича, ЦСКА навбатдаги ижобий натижадан кейин клуб рекордини янгилади. “Армиячилар” 2025 йил ҳисобидан мағлубиятсиз сериясини ўнта учрашувга етказиб олди.

Марко Николич шогирдлари янги йилдан кейин ўнта ўйиндан еттитасини ўз фойдасига ҳал қилди ва уч маротаба дуранг ўйнади.

Бундан ташқари, ЦСКА футболчилари жорий йил давомида ҳали бирор маротаба ҳисобда ортда қолмаган ва беллашувда биттадан кўп гол ўтказмаган. Чемпионат якунланишига икки тур қолган айни паллада Файзуллаев жамоаси мусобақа жадвалида учинчи ўринда бормоқда.