Февзи Давлетов: "Жамоамиз 4:0 дан кейин ўйнамай қолди"

“Сурхон” - “Андижон” (4:0) учрашувидан кейинги матбуот анжуманида мезбонлар устози Февзи Давлетов фикрлари билан ўртоқлашди.

- Албатта, мағлубиятли сериядан кейин футболчиларимизни руҳий томонлама тайёрлашимиз керак эди. Бундан ташқари, “Андижон”га тайёргарлик кўриш жараёнида ўз услубимиздан бироз чекиниб, рақибга тўпни топшириб прессинг қилишга ҳаракат қилдик. “Андижон”ни кузатгандик, бир-иккита кичик муаммолари бор эди. Шунга қарамасдан, услубимиздан бироз чекиниб ўйнадик ва яхши ҳаракат қилдик. Қувонарлиси, жамоамиз кўп зарба берди, кўп ҳужумлар ташкил қилди. Мухлисларимизни ушбу ғалаба билан табриклайман.

- “Андижон” клуби ОЧЛ 2 да қатнашяпти. Жамоа ҳозирча 3 та ўйинда 3 та дуранг ўйнади. Клубни имкониятини қандай баҳолайсиз?

- Ўйлайманки, имконият ҳар доим бўлади. Албатта, курашиш керак. “Андижон”да учта дуранг ва учаласи ҳам 0:0 билан якунланган. Четдан кўриниб турибдики, ҳужум ташкил қилишда балки қандайдир муаммолар бордир. Шунга қарамасдан курашиш керак ва албатта имкониятлар бўлади.

- Муҳаммад-Али Абдураҳмонов, Камрон Юсупов ва дублга эришган Беҳруз Жумаев ҳақида фикрларингиз қандай?

- Шуни айтиш керакки, ёшларимиз яхши потенциалга эга. Улар иқтидорли футболчилар. Бугунги воқеа катта қаҳрамонлик эмас. Негаки, уларни жуда қулай ҳисоб бўлаётган пайтда майдонга туширдик. Ҳа, улар ҳаракат қилишди, ёмон ўйнашмади. Умумий ҳолатда жамоамиз 4:0 дан кейин ўйнаймай қолди. Ёшларимиз эътиборимизда. Январь ва февраль ойларида ёшларимиз жамоамиз билан Туркия йиғинида ҳам қатнашиб қайтдилар. Жамоа билан бирга Тошкентда эдилар ва мавсумолди йиғинларида иштирок этишди. Шуни айтишим керак, ёшлар иқтидорли бўлишидан қатъий назар ўз устида ҳали кўп ишлашлари керак.