FIFA frantsiyalik futbolchining da’vosini qanoatlantirdi. Endi APL klubi 24,5 million funt kompensatsiya to‘laydi

Jan-Kevin Ogyusten FIFA qarori bilan "Lids"dan 24,5 million funt kompensatsiya olishi mumkin.

Gap shundaki, frantsiyalik futbolchi 2020 yilning yanvarida «Leyptsig»dan «Lids»ga ijaraga berilgandi. U jamoada 3 ta o‘yin o‘tkazdi va iyul oyi boshida nemis klubiga qaytdi.

Keyinchalik ma’lum bo‘lishicha, "Lids" chempionshipdan Premer-ligaga o‘tgan taqdirda futbolchini sotib olish majburiyatini olgan va 2019/20 yilgi mavsum yakunlariga ko‘ra, “Lids” APLga yo‘l olgan. Ingliz klubi bu majburiyatni bajarmadi va shartnoma 2020 yilning 30 iyuniga qadar hisoblanganligini, koronavirus pandemiyasi tufayli mavsum shu muddatdan keyin davom etganini va APLga chiqish 17 iyulda amalga oshirilganini ta’kidladi.

“Leyptsig”ning FIFAga bergan shikoyati qanoatlantirildi, Sport arbitraj sudi ham nemis jamoasi tarafini oldi va «Lids»ni 21 million evro (18,4 million funt) to‘lashga majbur qildi. Yakunda tomonlar mojaroni hal qilishga kelishib oldi va “Lids” 15,5 million funt to‘ladi.

Ogyustenning o‘zi ham nizolarni hal qilish uchun FIFA palatasiga da’vo arizasi berishga qaror qildi va u qisman qanoatlantirdi. Ehtimol, "Lids" to‘lashi shart bo‘lgan tovon miqdori futbolchining besh yillik maoshiga to‘g‘ri kelishi mumkin (haftasiga taxminan 90 ming funt).

“Lids” apellyatsiya berdi, biroq The Athletic so‘roviga javoban jarayonning borishi haqida izoh berishdan bosh tortdi.

Jan-Kevin Ogyusten ayni damda "Bazel" safida to‘p surmoqda. U joriy mavsum Shveytsariya chempionatida 12 ta o‘yinda maydonga tushdi va 3 ta gol urdi.