Флик "Барселона" мураббийи сифатидаги юбилей ўйинига изоҳ берди

Xанс-Дитер Флик "Барселона" бош мураббийи сифатида 100 та ўйин ўтказиши ҳақида фикр билдирди. 28 февраль куни бўлиб ўтадиган "Вильярреал"га қарши баҳс немис мутахассиси учун юбилей ўйини бўлади.

"Одатда рақамларга кўп эътибор қаратмайман, чунки уларни кузатиб бормайман. Аммо “Барселона” билан 100 та ўйин — бу ажойиб натижа. Аввал ҳам бир неча бор айтганман, бу мен учун орзунинг ушалиши. Бу жуда катта масъулият, лекин мен клубдан, ўйинчиларимдан ва шаҳардан олаётган ҳис-туйғуларимни жуда қадрлайман. Бу ҳақиқатан ҳам ажойиб, мен бу ерда жуда бахтлиман. Бундай буюк клубда ишлаш — мен учун катта шараф.

“Барса” мени анча ўзгартирди. Бу бошдан кечириш керак бўлган тажриба. Мен узоқ йиллар давомида мураббий бўлдим, ёрдамчи мураббий ҳам ишладим ва ҳар бир тажриба инсонни маълум даражада ўзгартиради.

Бу ерда менга энг ёқадиган жиҳат — биринчи кунданоқ ўзимни оиланинг бир қисми сифатида ҳис қилганимдир. Ҳар бир инсон ўз ишига ва клубга бутун қалбини бағишлайди.

Менда ажойиб жамоа бор. Яқинда рафиқам эслатди: иш бошлаганимда унга ҳар бир кундан завқланаётганимни айтгандим, чунки бу ўсишни ва ривожланишни истайдиган ёш жамоа эди.

Шу билан бирга, бу жамоанинг нима эканини тушуниш керак. “Барса” — бу ўзига хослик, ўйин услуби. Президент биринчи кунданоқ нафақат ғалаба қозониш, балки қандай йўл билан ғалабага эришиш ҳам муҳимлигини айтган. Мен ва мураббийлар штаби доим шу ҳақда ўйлаймиз. “Барса” каби клубда сен доимо ғалаба қозонишинг шарт", — деди Флик.